Гӏурбан денца мехкахой даькъалабийцар Мехкадас
Мехкахой, беррига бусалба нах Дала дездаь дайтача Гӏурбан ден цӏайца даькъалбийцар вай Мехкадас. Хьажол де бахарий гӏулакхаш чакхдоалаш, дукхача хана денз хьадаха бусалба динцара ӏадаташ доаржадеш дола беркате ди да из вайна массанена. Цу деношка сагӏа луш, мискача наьха дог хьоасташ, вӏаший безам бекъаш хул дог гӏоздаьнна бола бусалба нах.
«Хьажол де бахарий гӏулакхаш чакхдаьлар. Эзараш бусалба наха, вай мехкахой юкъе болаш, Дала шоашта тӏадилла параз кхоачашдир. Тахан Даьлага геттара дукха дуӏаш деш, хьесталуш, Цун къахетамга сатувсаш, гештдар дехаш да вай дерригаш. Дийца ца валлал хоза, беркате, деза ди да из вай дегашта. Къахетаме волча Аллахӏа къоабалдаь дӏаэцалда вай ӏибадат, укх деношка вай даь дуӏаш, Цо къахетам баь Шийна гаргадигарех хилда вай. Иразе, беркате, маьрша хилда вай массане денош. Дала къоабалдолда шун Гӏурба! Хьажол дебахараш а могаш, маьрша болаш цӏенах кхеталба! Амин!» - йоах вай мехкадас Келаматанаькъан Махьмуд-Ӏаьлас бахархошка ше деча къамаьла юкъе.
Цу цӏайна лаьрхӏа доккха сагӏа дӏадихьар вай мехка. Халача хьале барашта, могаш боацарашта, цхьаь бахача ха яхача наха, СВО доакъашхой дезалашта, балха тӏа вахар хаьдача ӏаьдала болхлой дезалашта юкъе дӏадийкъар сагӏа. Цу гӏулакхо хьагойт вай вӏаший оагӏув хьаллоацаш, гонахьарча наьха уйла еш, дикаш доаржаде ловш хилар.
