Мехкадас дийцар, Магасе хургйолча доал деча моттигий бокъонех йолча кхетаченах
Ардара бетта 28-ча дийнахьа Магасе хургья ӏХ-гӏа Россе юкъара доал деча моттигий бокъонех йола кхетаче, из вӏашагӏъеллай, Российски Федераце Президента Аппарато хьаллоацаш. Гӏалгӏайче иштта йоккха, лоархӏаш йола кхетаче дӏахьош хилар республиканна лерхӏаме да. Кхетачен балха дакъа лоацаш хургба федеральни министерствай, боахамий викалаш, Паччахьалкхен Думан депутаташ, иштта Россе хьалхале лелаю кхелахой, конституце, доал деча моттигий бокъон даькъ тӏара ӏилманхой. Цу майдан тӏа дувца таро хургья моттигерча доал деча даькъ тӏара болх дегӏабоалабара керттера дешаш, иштта пайда лургбола къамаьл дӏахьоргда цунна чудоагӏа закон дегӏадоаладара хьал тохкаш.
«Керттера дувца лаьрхӏа дош да, моттигерча доал деча даькъ тӏа федеральни керда закон юкъедоаладар. Цига дувцаргда доал деча даькъ тӏарча балха законех, уж нийса леладарах. Цу тайпара къамаьл дезаш да цигара болх дикагӏа дегӏабоалабара, кердача законо дӏадехар шоай балха юкъедаккхара. Со-се юрист ва, са балха стаж 40 шу совгӏа я. Цудухьа массайолча хана юридически балха лаьрххӏа йола терко лоаттаяр да аз хьадехар. Республикан боахама е доал деча даькъ тӏа хӏара керда хержача кулгалхочунга аз массаза оал: чӏоагӏде юридически гӏулакх, юкъебоалабе чӏоагӏагӏа бола говзанчаш, дикка бокъон хьал техкачул тӏехьагӏа мара хӏама тӏа ма эца. Юрист, каьхаташта кулг яздеча хана, цунга хьежача воалаш вац. Цун декхар да хьалххе а хургдола зе тахкар, из гуш хилар, закон телхадеш хиларах хоам бар; республикан, иштта кулгалхочун хьашташ кхоачашдар. Юридически оагӏув дика ший болх бовзаш, из дӏахьош хилча; дукха кхоачамбоацараш, царех зе далалехь, юстардаха таро хул», - аьлар Гӏалгӏайчен Кулгалхочо Келаматанаькъан Махьмуд-Ӏаьлас.
Республикан Кулгалхочо яхачох, чӏоагӏа юридически оагӏув керттера ба кулгалхочун га даккха дезарех. Цо белгалдир, къаьстта цу тайпара хила веза балхаца, моттигерча ӏаьдала балха тӏа санна, дерригача доал дара даькъ тӏа а.
Мехкадас лоархӏ, Магасе дӏахьош йола кхетаче накъаяргья профессиональни къамаьл деча, цо иштта таро лургья Россе кхыча моттигашкарча говзанчашкара балха говзал хьаэца, бокъоний кӏийле тоае. Цо къаьстта белгалдир цу тайпара хаттараш кхоачашде дезаш хилар, цар таро лургья доал деча даькъ тӏа тешшаме болх лелабе, бокъонаша дӏадехача беса бахархой хьашташ кхоачашде.
