Мехкада: Цахаддаш токаца ӏалашо яр - юкъарча бехктокхамца дувзаденнар
Гӏалгӏайчен токацара хьал тоадара дер дукха да. Цу программанна чудоагӏаш да тока саьргаш хувцар, къаьнара гӏирсаш кердадахар, моттигашкара хьал тоадар. Карарча хана цӏенхашта тоадеш латт Наьсарен кхален Эккажкъонгий-Юртара дакъа. Укхаза вах 30 эзар саг; цул совгӏа, дукха вахара, дешара моттигаш а я.
«Къаьстта йола терко лоаттаю берий бешамашта, ишколашта токацара хьал лоаттадара. Из болх цу даькъ тӏа дика вӏашагӏбелла хиларах тийша да, цига дика кхетам балар а. Тока гӏирсаш лаьгӏа болх беш хилча, цу моттигашка санна, дезалера а хьал во хул. Цу юрта 20 керда бӏоагӏа ӏобегӏаб, 100 «пела» хийцад, кхо километр дӏаьха керда тока саьргаш дахийтад. Ардара бутт чакхбалале кхы а 2,5 километр тока саьргаш хувцаргда. Из болх Эккажкъонгий-Юрта дӏабихьа ӏац. Карарча шера бархӏ бетта 51 км тока оагӏув хийцар, 2 106 «пела», иштта 34 трансформатор тӏа болх дӏабихьаб. Лостам бир 23 гектар лаьтта цӏендеш, йокъаенна баьцаш, кӏотаргаш дӏайоахаш. Къаьстта йола кийчо гуйран-ӏан зама тӏайоагӏаш еш я: говзанчаша технически гӏулакх дара балхаш дӏадихьар, 200 гӏирс меттаоттабир. ЮД меттаоттайир», - аьлар Гӏалгӏай Республикан Кулгалхочо Келаматанаькъан Махьмуд-Ӏаьлас.
Цо белгалдир, тока саьргаш кердадахар - из даим дӏахьош бола болх ба. Цо яхачох, лоархӏаме да ший ханнахьа уж деха моттиг гучаяккхар, тоаяр, хӏана аьлча доккха лоа ӏодилла, шелал эттача, цар доккхагӏа зулам дергда.
Гӏалгӏайчен Кулгалхочо белгалдир тока гӏирсаш шоай ханнахьа, талха ца талхаш, болх беш хилар - из вай юкъара декхар да. Цун дикал тийша я говзанчах санна, бахархоех, бизнесах. Ший ханнахьа мах дӏалуш хиларо цахаддаш наха тока хьалаш лоаттадара таронаш совйоахаргья.
