Мехкада: Сталинградерча тӏема юкъе дакъа лоацаш хиннаб вай къаман бӏухой
Сталинградера фашист вохавар, лира тохаш араваккхар вай мехка исторе оагӏонца лоархӏаме моттиг дӏалоацаш долга белгалдир вай мехкадас Келаматанаькъан Махьмуд-ӏаьлас. Из хоам «Сердалога» бера мехкадаь зарбан болх лелаберашкара.
Сталинграде духьале еш хиннача вай салташа моастагӏчун вӏалла цаметтар гойталга белгалдир Мехкадас.
«Сийлахь-боккхача Даьймехка тӏемца лоархӏаме хилар къаьстта Сталинграде вай бӏухоша яь духьале. 200 ден-бус, вӏалла ца соцаш, лаьттача тӏема юкъе йоккха майрал, фашист цецвоаккхаш дола денал гойташ лаьттар советски эскар. Кавказерча маьхкдаьтта тӏакхача гӏерташ Гитлера вӏашагӏделлар деха дӏадахар, вӏалла царна ца меттача тайпара! Советски Союза адама цу шахьаре эттача тӏемага гӏолла бӏаргадайтар фашисташта шоай лаьтташка цар ког лувзаргбоацилга», - белгалдир вай Мехкадас.
Республикан кулгалхочо иштта теркалдир, Сталинградера моастагӏа вохавеш хиннача тӏема юкъе вай къаман деналах бизза бола къонгаш лаьтталга.
«Эдал тӏа уллача шахьаре эттача тӏема юкъе духьале еш яр 255-гӏа кавалерийски къаьстта йола полк. Сталинградера фашист вохавеш лаьттарий цӏераш «Мамаев курган» яхача моттиге дӏаязъяь латт. Гӏалгӏай юрташкара Цӏеча эскара эпсараш, салтий ба Даьхен лаьтташ мукъадоахаш белгалбаьннараш», - аьлар Макшарипа Мухьмуд-ӏаьлас.
Моастагӏа вохавеш лаьттарий цӏераш вай мехка массахана еза хургья! Тӏехьенгара тӏехьенга кхоачаш, дахаргда цар денал дувцаш мел яздаьр.
