Мехкада: СВО ветеранаша дика юкъейоалаю шоай балха говзал ӏаьдала гӏулакхе
Россе Президента Путин Владимира тӏадиллача декхарах, «Турпалхой ха» яхача кхоалагӏча даькъа болх дика дӏаболабеннаб, из лаьрхӏа ба СВО бӏухой, ветеранаш хьаллацара, царна паччахьалкхен урхаллен балха даькъ тӏа шоай говзал юкъеяккха таро ялара. Цу кердача балха оагӏонна чудоагӏаш да дешара хьал хувцар - вуз яьккха дипломаш ца хилча а мегаш да. Цу юкъе дакъа лаца йиш йолаш ба Россе бахархой, шоаш дӏахьоча тӏема даькъ тӏа турпалал гойтараш, юкъара е юкъера, иштта лакхара дешар дийшараш.
Гӏалгӏайчен кулгалхочо Келаматанаькъан Махьмуд-ӏаьлас белгалдир, 2025 шера республике дӏайолалуш «Турпалхочун никъ» яха болхлой харжара программа йолга, из я 2026 шера аьтинга бетта чакхъяьнна хьалхара программа санна. Дехараш дӏаденнача 174 бӏухочох чакхваьлар ийс саг, царех ворхӏ саг дика дийша а ваьлар. Кхы а СВО 32 сага республикан болхлой мугӏараш хьалдизар.
Программо дика толамаш гойтар. СВО доакъашхо Хьаьшанаькъан Ӏалихан хьожавир арахьарча бувзама, къаман политикан, хоамий, зарбан министра гӏончалла, хӏаьта Къоастой Ваха Лоаман кадетий корпуса кулгалхо.
Цул совгӏа, лаьрххӏача операце ветеранаш чубоагӏаш ба Гӏалгӏайчен Халкъа Гуллама Vӏӏӏ-ча кхайкарала. Депутатий мандаташ дӏаделар Къоастой Ваханна, Местой Мухьмада. Уж ба «Турпалхочун никъ» яхача проекте котбаьннараш. Келаматанаькъан Махьмуд-Ӏаьлас яхачох, цо хьагойт уж паччахьалкхен декхараш кхоачашде кийча хилар. Цо аьлар, «Турпалхой ха» яха федеральни программа хиларах, дӏахо а бӏухошта хьалхашка таронаш хьаелларгья, цар Даьхенна мутӏахьа хилар тахан лоархӏаме да.
Дехараш хьаэцаргда лаьрххӏа «Турпалхой ха» яха кхоалагӏа дакъа дӏахьош, https://время героев.рф/ программа сайта тӏа 2026 шера лайчилла бетта 9-ча денгара 2027 шера наджгоанцхой бетта 25-ча денга кхаччалца. Кандидаташа анкета язъе еза эссе дош тӏадолаш, иштта хоржамах чакхбала беза, цига царна тӏем тӏа карагӏдаьннар дӏалоархӏаш хургда.
