«Зарница 2.0» яхача Ерригача Россе ловзаре, дакъа лоацаш хургья вай мехкара тоаба

«Зарница 2.0» яхача доккхача, Ерригача Россе тӏема- мехкагӏончий ловзаро боккхача мехкара миллионаш къонабараш гулбу. «Кагирхойи бераши» яхача къаман проектага гӏолла «Хьалхарчар боламо», «Къначар эскаро», «Тӏемхо» яхача оагӏоно боаржабеш ба из боккха болх. Дикка къахьега дезаш ба къонабараш цу юкъе. Шоаш къаьстта болаш, тоабанца лоархӏаме декхараш кхоачашдара говзал дӏахьокха езаш ба уж. Цу юкъе да тактически лорий гӏулакхаца, топографеца, саг чувоацаш гӏетташ долча гӏирсашта доал дарца, иштта моллагӏча хӏаманна духьалъотта кийча хиларца дувзаденнараш. Доакъашхошта гӏо деш хьехамчаш, СВО ветеранаш, Россе турпалаш ба», - йоах «Сердалога» «Хьалхарчар болама» моттигера бенача хоамо.

«Дозор-06» юкъерча къонабарашта чӏоагӏа лоархӏаме да, шоаш дикача оагӏорахьара дӏабовзийтар. Кийчо еш массехк бетта къахьийгад цар. Шоай мел йола говзал, хьинар дӏагойта аьттув ба цар хӏанз. Ерригача Россе яхьашка Гӏалгӏайче дӏайовзийтар тӏалатт царна, цунга хьежжа шоай мел бола низ ураоттабе лаьрхӏа ба уж.