«Даьхен лорабой» яхача ганза болхлой, Илдарха-Гӏалий тӏара СВО ветеранаш болча баха хилар
Илдарха-Гӏалий тӏарча дегӏа могашал меттаоттаярах йолча моттиге ха йоаккхаш бола СВО ветеранаш болча баха хилар, «Даьхен лорабой» яхача ганза мехкарча филиала болхлой. Тӏема аренашкара цӏабаьхка ветеранаш шоай унахцӏенон хьал меттаоттадеш ба цига тахан. Царна фу эш, хьашташ кхоачашдар мишта латт тохкаш хилар филиала къахьегамхой.
«Ганза мехкарча филиала болхлошта хьалхашка лаьтта керттера декхар тӏема операце ветераний хьал миштад, терко яр боаггӏача боараме дий тахкар да. СВО бӏухошца, цар цӏагӏарча нахаца, иштта цигарча лорашца къамаьл дир цар, цхьаккха кхоачамбоацар дий хьожаш. Ветеранашца цар дийцар ТСР каьхаташ кийчдара балхах, ӏаьдалгара хьадоагӏаш дола гӏо лоаттадарах, иштта цигара арабаьлча санаторе салаӏа, дӏахо могашал меттаоттае баха аьттув хургболаш деррига вӏаштӏехьадаккхарах», - йоах «Сердалога» ганза филиалера бенача хоамо.
Белгалдечох, хӏара унахочун къаьстта терко еш, хьожаш ба цига. Бӏухошта хинна човнаш тайп-тайпара хиларах, дарба дар а цунга хьежжа хӏаранена ший тайпара да. Могашал меттаоттаярал совгӏа, психологически хьал меттадоаладеш гӏо ду цига. Тӏема аренашка хала денош текха цӏабаьхкача бӏухошта, вахаре цхьацца моттиг хьалаьца дӏанийсбала новкъостал деш, лаьрххӏа оттабаь лакха говзал йола болхлой ба цу моттиге.
