Гӏалгӏайчен культуран болхло мехкашта юкъерча суртий яхье котъяьлар
Гӏалгӏайчен Шолжа кхален Оалкамарча культуран Цӏен методист Хамхой Паьтӏамат дакъа лоацаш хилар «Гуш я Росси: дукхача къамий» яхача суртий яхье, цунна делар «Россе къамий цхьоагӏо чӏоагӏъяр» яхача лаьрххӏача даькъах дола лауреата Диплом.
«Кхоллама проект хетаяь яр Россе къамий цхьоагӏон Шу хилара, цунна чубоагӏаш бар кӏоарга сакхетам. Яхь дӏахьош хилара керттера бахьан дар, вай боккхача мехка хозал шоай сурташка гӏолла гойтар. Яхье хьадайтача балхашка тайп-тайпарча мехкарча автораша Россе хьамсарча наьха сурташ даьхадар, иштта го йиш яр къаман культура, ӏадаташ, цӏай, иштта лора а еш, вай тӏехьенгара тӏехьенга кхоачаш йола кулгаговзал», - аьлар Оалкамарча культуран Цӏен кулгалхочо Гӏарбакханаькъан Мадинас.
Хӏара дийнахьа Оалкамарча культуран Цӏагӏа къахьегаш йолча Паьтӏамата, цу тайпарча кхетачене дакъа лацар ший профессиональни болх дӏахобахьар дар. Лаьрххӏача даькъ тӏа цо совгӏат даккхаро тешал ду цун гонахьара ӏалам дезаш хилара, цо гойтар хьамсарча мехка еррига хозал, иштта кӏоарга философе маӏан - доттагӏала лерхӏам, дӏаяха ханаш дагаахар, Россе дерригача къамашта юкъера бувзам.
Кхелахоша лакха мах оттабир цун балха. Цо баьча балхах гуш дар республикан культуран Цӏеношка шоай балхах, мехках дог лазаш, лакха говзал йолаш нах хилар, цар кхоллам гуш хул ерригроссийски боарам тӏа.
