Ерригача Россе донорски болам хьаллаьцар ВУЦ ИнгГУ курсанташа, эпсараша
Гӏалгӏай паччахьалкхен университета Тӏема гӏулакх ӏомадеча оагӏон эпсараша, курсанташ ерригача Россе дӏахьош бола «Донор хилара низ цхьоагӏонца ба. Дӏаязле – гӏо де» яха болам хьаллаьцар. Кхоана Даьхе лорае отта безараш цӏий дӏачуденна ӏанзар, тӏехка тӏум дӏачутелача Федеральни моттиге дӏаязбелар уж.
«ВУЦ доакъашхошта юкъе дикка хьаллаьцар из болам. Цхьабараш эггара хьалха баьхкабар цӏий дӏачудала, хӏаьта цхьабараша из гӏулакх хьаллоаца дукха ха яр. Дӏахойодача хана кхы а шерагӏа йоаржае лерхӏ мехка цӏий, тӏехка тӏум дӏачутела нах тӏахьехаш йола кхетаченаш. Белгалде деза, хала лазараш токхаш болча унахошта цох доккха новкъостал хулилга», - дийцар «Сердалога» ИнгГУ зарбан болх лелабераша.
Тӏема гӏирс бувхаш болча къонабрашта чӏоагӏа лоархӏаме хийтар из гӏулакх хьаллацар, доаржадар. ВУЦ курсанташа белгалдир, моллагӏча тӏема гӏулакх дӏахьош волча сага декхар из долга. Цу боламо хьагойтар, вай къаман нах вӏаший гӏо де, дика гӏулакх доаржаде кийча болга.
