Магасера кванторианцаш «АртТехно» яхье котбаьлар
Республикански «Кванториум» яхача берий технопарке Ӏомалураш котбаьлар «АртТехно» технически кхоллама Халкъашта юкъерча яхье, из дӀайихьар Ханты-Мансийски куран, Югры яхача «Г.Ф. Атякшева цӀерагӀча лицея» бюджетни юкъарча дешара «Кванториум» берий технопарко, яхаш, дийцар «Сердало» газетага цу дешара моттига администраце.
«Яхьаш йоаржайир 11-17 шераш даьннарашта юкъе, уж бар мехка тайп-тайпарча моттигашкара баьхка. Бераш дар баннер е афиша хьакхолла езаш графика редакторашца (Photoshop, Adobe ӏllustrator, CorelDraw, Krӏta иштта кхыча) «2026 – Россе къамий цхьоагӀон ди» яхача темах. Жюри юхахоржача хана конкурса тема йоагӀаш йий, из нийса дӀаяхьар, хьагуш дола композице сурт, хозал, шоайла тарлуш хилар, бесаш нийса доагӀаш хилар, типографе оагӀув нийса хилар (алапаш шоай боарам болаш, атта дешалуш хилар, формат нийса лелаяр). Вай мехкахочо Кхоартой СайфуллахӀа 1-гӀа моттиг яьккхар 13-15 шу даьннарашта юкъе. Мисловранаькъан Абубакр дикагӀчарех хилар 16-17 шу даьннарашта юкъе»,- аьлар хоамо.
«Даькъалабувц котбаьннараш цу совгӀаташца! Доаккхал ду шо иштта кхеташ, лакха говзал йолаш хиларах», – аьлар берий хьехамчаша.
