Гӏалгӏайчен массазарча викала фусамо кагирхой ловзарца кхотабир
«Мехкашта юкъера Квиз-Лига. Москва» яха кхетама хьал гойташ йола турнир дӏайихьар Москверча гӏалгӏайчен постпредстве. Къаман цхьанкхетара шера хетаяь из кхетаче дукха адам гулдеш хилар. Москверча вузашка дешаш болча студентий тоабаш яр цига.
«Шоай мел йола говзал, тоабанца шоашта болх дӏабахьа хар, сихха, ха ца йоаеш, декхар кхоачашдар мишта хила деза гойташ бар кагирхой. Беррига доакъашхой дикка кийчо яь болга бӏаргадайра тӏахьожаш хиннарача кхелахошта. Хьалхара моттиг Гӏаьбартой-Балкхарой мехкарча «Эльбрус» яхача тоабанна кхаьчар, шоллагӏча моттиге селий мехкара «Сарир» яха тоаба эттар, хӏаьта кхоалагӏа моттиг вай мехкарча «Ираз» яхача тобанна елар», - дийцар «Сердалога» Гӏалгӏайчен массазарча викала новкъосташа.
Из кхетаче дӏахьош хиннараша белгалдир, иштта йолча турнираша Росси къамашта юкъера барт, бувзам чӏоагӏбелга. Россе Паччахьалкхенна чудоагӏаш долча къамий нах вӏаший машар лоаттабеш даха ловш долга теркалдир цига.
Берригаш раьза болаш, массане дегашта тоам хулаш дӏаяхар из кхетаче. Дӏахо йодача хана а мехкашта юкъера лоархӏаме, пайда боаржабеш йола яхьаш лелае лаьрхӏа ба цига.
