Гӏалгӏайчен волейбол дегӏаяра йолча таронех, дӏахо де лерхӏачох дийцар «Сердало» газетага волейбола моттигерча Федераце президента Гӏуденаькъан Сулумбика Мовсара.

- Мовсар, мишта дегӏайоагӏа тахан Гӏалгӏайчен волейбол?

- Вай мехка волейбол дегӏаяра хьал башха дика латтац. Дукхача хана денз, из спорта оагӏув терко йоацаш битаб. Бакъда хӏанз Гӏалгӏай Республикан волейбола Федераце; Гӏалгӏай Республикан физически культуран, спорта Министерствоца цхьана; дукха къахьег вай бахархой цу спорта юкъеоза гIерташ.

- Малагӏа проекташ кхоачашъеш да шо физически культура дегӏайоалаеш, цу юкъе волейбол а?

- 2025 шера Гӏалгӏай Республикан чемпионат дӏайихьар, цига пхе бетта шийтта тоаба хилар кубок къовсаш. Чемпионате котъяьлар «Наьсаре» яха тоаба. Иштта дӏайихьар шиъ республикан, цаӏ халкъашта юкъера яхьаш.

Тӏадоагӏача шера оаха лаьрхӏад аргӏанара чемпионат вӏашагӏйолла, иштта дӏахьоргья массехк яхь боккхагIчарна а, иштта берашта а юкъе. Хьалхарча аргӏагIа тхо кийчлуш да Гӏалгӏай мехка чемпионат дӏаяхьа, волейбол езарашта юкъе. Маьтсела бетта дӏахьоргья волейболах йола республикански яхь, кхы а цхьа бутт баьлча - мехкашта юкъера яхьаш, уж хетаяьй Гӏалгӏай Республика хьакхеллача Денна. Ахкан замах дӏахьош йола яхьаш оаха лаьрхӏад «Магас» оалача спорта Цӏагӏа дIаяхьа, маьцхали бетта ветеранашта юкъе хургья уж. Ардара бетта ховш хургья волейболах йолча республикан шоллагӏча бIала юкъе котбаьннарий цӏераш.

- Из спортивни оагӏув дукхагӏа маӏача наьха я е кхалнаьха я?

- Гӏалгӏайче волейболах ловзараш дукхагӏа маӏанах ба, хIаьта а цунца цхьана из лелаю дешара моттигашка кхалнаьха тоабашта юкъе а.

- Волейболах ловза ловш бола кагирхой дукхагIа хулаш бий?

- Кагирхой цу спорта юкъеозара болх дӏахьош ба, бакъда совбоалаш боагӏа аьлча нийса хургдац. Волейбол йоаржаяра оаха каст-каста яхьаш чакхйоах. 2026 шера, 8-11 классашта юкъе яхьаш дӏахьоргья, уж лаьрхӏа я дешархошта юкъе дика яхьаш вӏашагӏйохкара, уж даим спортаца хьоашал леладара тӏера хургболаш.

- Яхьашкара доакъашхой мишта хьаллоац оаш?

- Оаха кубкаш, майдилгаш лу котбаьннарашта. Из цар толам баьккха хилара дола тешал да.

- Мовсар, баркал хьона тхоца къамаьл дарах. Вай мехка волейбол йоаржаяра тӏехьа хьо хьаллоацараш денгара денга дукхагӏа хилба.

Лоацца вахарах:

Гӏуденаькъан Сулумбика Мовсар ваьв 1983 шера, НГIАССР Шолжа-Гӏалий тӏа.

2000-2006 шерашка из дешаш хилар Москверча паччахьалкхен технологей, урхал дара университета «Технологически хьалий автоматизаце, хIама кхоллара» факультете. «ХIама кхоллача, бизнесе компьютерни хьалаш леладарах» йола говзал ӏомаеш вар вай мехкахо.

2007-2011 шерашка дешаш хилар Гӏалгӏай паччахьалкхен университете, «Юриспруденци» (уголовни бокъо) яха говзал ӏомаеш.

04.2008-08.2010 шерашка - Гӏалгӏай Республике гӏолла йолча МВД аппарата чурча гIулакхий воккхагӏа вола инспектор.

10.2011-06.2012 шерашка - «Гӏалгӏай Республикан гӏишлон даькъ тӏа маьхаш оттадара республикански центра ГУ керттера говзанча.

01.2014-10.2016 шерашка- «Эковест-М» ООО (Якутерча, Мирни-Шахьара) керттерча кулгалхочун гӏонча.

Карарча хана из ва, Гӏалгӏайче мара кхы йоацача, светодиодни оалача лампаш арахецаш йолча «Электрон» ООО кхеллар, иштта цун керттера кулгалхо.

Дезалера хьал: фусам-нана, ши дезалхо.