Дзурдзукашта хьалха латташ ва из цу кинон юкъе. Дакъа лоацаш ба боккха актёраш санна, къона студенташ а. Къаман артист вола вайна массанена дика вовза Эсамарзанаькъан ӏалаудин ва цу киноцара аьшкапхьара роль ловзаер. Цул совгӏа, «Дов нана» яха илли оал цо.

Могушканаькъан Халид эггара къонагӏа вола актёр ва, Эске роль ловзаеш ва из. Лакха начӏал дола дукха актёраш ба кинон болх дӏахьораш. Дӏабахача бетта арадаьлар из фильм. Чӏоагӏа дукха нах бар из арадаларга сатусаш хиннараш. Из деррига мишта, мичахьара дӏадолалуш да дувцаргда вай…

Лакха лоамаш, чхараш, деррига сурт тоадеш йола кхерах яь гӏалаш, хьийдда лоам чура доагӏа хиш – из деррига ма дарра цу балха маӏан довзийташ да. Кавказерча ӏаламца дувзаденна дола хӏамаш да уж.

«Дзурдзуки» яха дош мичахьара, маца гучадаьннад тахка вай эттача, из чӏоагӏа къаьнара, вай къаман исторена юкъе башха моттиг дӏалаьца, гӏалгӏай мичахьара хьабаьннаб довзийташ дола дош да ала деза. Дзурдзукете лаьтташка татрий-маалой цӏоз чугӏерта хинна ханаш я ювцараш.

Дзурдзукаш духьалъэттаб деналца, майралца шоай лаьтташ цар кара ца кхачийта, шоай ӏадаташ, истори царга доха ца дайта. Гӏалгӏай къамо, тхьоврача хана денз, хьеракӏиг санна лорадеш, сийдеш, цхьаккха а саг тӏа ца кховдийташ хьаденача гӏулакхашта, хӏамашта хетадаь да кино. Тӏехьара тӏа ураоттаргйолча тӏехьенга деррига иштта лорадеш дӏакхачийта дезилга белгалдеш болх ба тахан оттабаьр.

Гонахьарча нахацара лерхӏам, геттара везвеш хьаьша тӏаэцар, къахетаме хилар, яхь, сий лорадар, деналца хилар – из деррига тхьоврача халача хана денз гӏалгӏаша, ӏо ца дуллаш, хьадена да. Гӏалгӏай къаман вахар цу гӏулакхех латташ хиннад.

Турпалхой вахара деношка гӏолла хьахьокхаш да уж деррига хӏамаш, вай къаман эздий ӏадаташ. Ма дарра аьлча, вай исторически селхане лораяра тӏехьа чӏоагӏа лоархӏаме, йоккха моттиг дӏалоацаш да из кино. Актёраша, кинон юкъе дакъа лоацаш мел бараша дикка къахьийгалга гуш да, цунга хьажа эттача. Кхувш латтача къонача тӏехьен вахаре чӏоагӏа лоархӏаме болх ба из, ала деза тахан.

Оздой Ясмина