Дог а лазаш, хьаллацар
«Даьхен лорабой» яхача ганза болхлоша терко лоаттаю ветеранашта, цар дезалашта
Украинерча тӏема операце аренашка вахар хаьдача, де доацаш байнарашта юкъе болча бӏухой дезалашта гӏо деш, царна терко лоаттаеш къахьег «Даьхен лорабой» яхача ганза вай мехкарча филиало. Къаьстта лоархӏаме моттиг дӏалоац бӏухой даь, наьна хьашташ кхоачашдаро, царна эшаш дола дарба лоаттадеш могашал лораяро. Акбулатовгӏар Майрбика Руслана вахар хаьдад тӏема моттигашка декхараш токхаш. Унахцӏенон хьал дика доацаш я воӏ дӏаваьнна гӏайгӏо тоӏаяь нана.
«Даьхен лорабой» яхача ганза болхлочо Коазой Хьамида эшаш мел долча хӏаманга хьежа, Жӏайрахьа кхален дарбанче ӏоюжаяйтар из. Лоамашта юкъе, цӏена фо долча уллаш йолча дарбанчера лораш шоашта могачох Межиевгӏар Аьсета могашал меттаоттае гӏерташ ба тахан.
«Даьхен хӏама лораде арабаьнна вахар хаьдача бӏухой даьга, наьнага хьожаш хилар, массахана бувзаме долаш, царна эшар ӏалашде гӏертар тахан тха лоархӏаме декхар да. Къонгаш дӏабаьнна бисача цу нахагара хало, гӏайгӏа дийца ца валлал йоккха я, из деррига кхетадеш да тхо тахан. Оагӏув хьаллоацаш, царна уллув долаш, хила деза тхо. Хан-ханнахьа лорашка чакхбоахаш, дегӏа могашала терко лоаттае еза, саготоно саг сиха кӏалвутилга ховш ма дий вайна», - аьлар Коазой Хьамида.
Тахан берригача мехка тӏемхошта, цар дезалашта гӏо лоаттаде, оагӏув хьаллаца хьожаш ба. Даьхен гӏулакхе латтарий хам баь даргдац вай мел хьежача а, царга хьажар, цар цӏагӏарча наьха хьашташ кхоачашдар керттерча декхарех да.
Турпалий никъ атта хиннабац цӏаккха, яхь йолча, деналах, майралах бизза болча къонгий сий деш хила деза вай. Паччахьалкхено массахана терко лоаттаергьярех ба уж нах, цар дезалаш. Могаш, маьрша болаш, цӏенах кхеталба шоай мехках хьегаш тӏема аренашка лела вай къаман къонгаш!
