Хӏама тоадалара никъ
Машиний профсоюза ӏX-ча съезда доакъашхо хилар вай мехкахо
Машинашцарча балхах болча оагӏон профсоюза ӏX-ча Ерригача Россе съезд дӏаяхьаро цу оагӏонца дувзаденна дола керттера хаттараш дашха, тахка аьттув лу. Укх шерарча цу йоккхача кхетаче дакъа лоацаш хилар 108 совгӏа викал. Цу юкъе бар лоархӏамеча цу оагӏонцарча моттигашкара болхлой, инженерно-технически оагӏонцара къахьегамхой. Вай мехкара цига ваха хилар машиний оагӏонцарча ерригача Россе мехкарча профсоюза, наькъий боахама кулгалхо вола Бузуртанаькъан Муса.
Цо белгалдир, кхыдолча мехкашца бувзаме волаш, цу оагӏонцара болх дӏабахьар пайда беш долга. Вай мехкарча профсоюзхошта лоархӏаме да болх боаггӏача боараме, хӏара денна дикагӏа тоабеш дӏабахьар. Съезда балхах дувца велча, дега боккха тоам беш хоам ба цу оагӏонца.
Ломакин Владимир дӏахо а ший декхараш кхоачашде хержар. Цу гӏулакхо хьагойт, ший гӏулакх цо лерттӏа леладаьлга. Цо къахьегарца, цу оагӏонцарча болхлошта алапи лакхде аьттув баьлар. Цо кулгал деча юкъа дикача оагӏорахьа тоаделар из гӏулакх. Машиний оагӏонцарча балха тӏара алапеш 47, 4 тӏара 85,8 эзар сомага кхоачаш айделар, наькъашкарча боахамцара алапи 39, 2 тӏара 46 эзар сомага кхоачаш айденнад, хӏаьта горэлектротранспорте 29,1 тӏара 55 эзарнега кхоачаш айдаьд.
Профсоюза хӏама тоадергдолча гӏулакхех дийцар съезде гулбеннараша. 2026-2028-гӏа шераш чулоацаш, Российски Федераце наькъашкарча боахама кхаь оагӏонцара чӏоагӏо оттайир наькъий гӏулакхех йолча Федеральни моттига, «Машиний оагӏонцарча болхлой Ерригача Россе союз» яхача моттиго, «РАДОР» яхача машиний наькъашта доал дарах йолча российски ассоциаце.
Цу юкъе чудоагӏа алапеца дувзаденнараш, къахьегарашта доагӏаш дола цхьаццадараш, иштта кхыбола аьттув. 2023-2025-гӏа шераш чулоацаш оттаяьча чӏоагӏон оагӏонца къахьегачар бокъонаш лораярца, иштта кхыдарашца дувзаденна керда хӏамаш белгалдаьд. 2020-2025 шераш чулоацаш йолча доклада тӏа Ломакин Владимира белгалдир, тахан эггара керттера дола кхоачамбоацараш меттадоаладара тӏехьа къахьега дезилга.
«Цу съезде дакъа лацар тхона массанена чӏоагӏа лоархӏаме дар. Тахан кхоачашде аьттув баьннарех доаккхал деш да тхо, дӏахойодача хана а хьинаре, бехктокхаме болх дӏахьош цу оагӏонца дувзаденнараш дикка тоаде деза. Геттара чӏоагӏа дега тоам беш да, Ломакин Владимира ший декхараш дизза кхоачашдара, ший болх лерттӏа хьаоттабе хара тӏагӏолла наха алапеш айдеш хилар.
Аз массанегара доккха баркал оал кердача болхлошта, аьттув болаш, беркате хилба цар болх»,- белгалдир Бузуртанаькъан Мусас. Москве дӏайихьа съезд вай мехкарча машиний оагӏонцарча болхлой ерригача Россе профсоюза, наькъий боахама хӏама тоадеш хилар. 2026-ча шера доккхача, дикача хувцамашка сатувсаш ба вай профсоюзхой, хӏана аьлча кхоачашде дезараш геттара дукха да.
