Гӏалгӏай Республикан Новгород-Шахьарерча массазарча викалах Бохтаранаькъан Руслана Къамбулатах хилар вай мехкахошта тешшаме новкъост, из кийча хул чоалхане хьалаш эттача оарцагӏвала. Ше «Сердало» газетаца къамаьл деш цо белгалдир ший балхаца дувзаденна керттера дешаш, иштта цо дийцар, мехка европейски оагӏорахьа гӏинбухен-малхбузехьа яхаш йола гӏалгӏайчен юкъарло дегӏайоалаяра беча балхах.

- Къамбулат, Хьа болх малагӏча оагӏон тӏаберзабаь ба?

- Са болх хетабаь ба арахьа бахача республикан бахархой хьашташ хьаллацара, регионашта юкъера бувзам дегӏабоалабара.

- Гӏалгӏайчен паччахьалкхено, Новгородски областа ӏаьдало, юкъарлон моттигаша бувзама болх дика вӏашагӏбеллаб аьнна хетий Хьона?

- Цхьана дӏахьош бола болх дика вӏашагӏбеллаб: ӏаьдала моттигий, гӏулакхерча наьха шоайла пайда эцаш бола бувзам ба. Тха дӏахо а бувзам лелабара дика кӏийле я, тхо лаьрхӏа да из бувзам дегӏабоалабе.

- Хьо болх бе дӏаволалуча хана, лорий дешар дешаш вар. Цу хана хье горий хьона, Гӏалгӏай Республикан Новгородски областера викал санна?

- Вузе дешаш волча хана, бувзам лелабара тӏехьа дукха балхаш даьд аз, бакъда ишттал лакха болх сайга кхоачаргба аьнна дагадацар, деррига а тӏехьагӏа дӏадоладелар.

- Хьона хьалхашка дукха декхараш латт, царех цаӏ да вахара, экономически, культуран бувзам лелабар. Массаза таро хулий лаьрхӏар чакхдаккха?

- Лаьрхӏар кхоачашде ма хетта вӏаштӏехьцадалар дувзаденна да, шинна а оагӏон хьашташ эргаш хиларца, таронаш кӏезига хиларах, вахара-культуран даькъ тӏара хьал мела хиларах. Керттердар да цу хьалашка дӏаӏамар, ма хетта лаьрхӏар кхоачаш ца хуле а, из гӏулакх юкъахцадитар.

- Малагӏа цатоамаш нийслу балха тӏа, мишта дӏадерзаду оаш уж?

- Хьалхарча аргӏагӏа из къамашта юкъера хьал да (вахарера халахетараш, бувзама оагӏонашка геттара кӏома ювца ДТП). Цатоам оттаргбоацаш, из санна дола хьал эттача, со цига вода, се тӏаволаш из къоастаду.

Бахархошта хьалхашка каьхаташца дувзаденна хаттараш отташ хилча, е балха оттара тӏехьа халонаш нийслойя, оаха даим бувзам лелабу мэреца, УМВД, иштта къаман викалашца, сиха юристаш юкъе а боахаш, мехкахой хаттараш кхоачашду.

Нагахьа санна вай мехкахошкара цатоам бола гӏулакх нийслуш хилча (цхьацца болча наха юкъарлон бокъонаш толхаяр), оаха дӏахьу хьехам луш бола болх: кагирхошца кхетаче йийя, моттигера боарамаш, ӏадаташ довзийт.

- Фуд хьа балха керттерча даькъе чудоагӏар?

- Са балха чудоагӏаш да мехкашта юкъера бувзам лелабар, Гӏалгӏай Республикан хьашташ довзийтар, иштта юкъарча вахаре дакъа лацар. Новгородера викал се хиларах тарра, сай балха чудоагӏаш, аз гӏо ду республикал арахьарча гӏалгӏай барт, цхьоагӏо хилийтара, тайп-тайпарча бахьанашца из чӏоагӏдеш. Массахана бувзам лелабу диаспораца, цунна новкъостал ду барт хилийта гӏерташ, иштта вӏашагӏйохк культуран, кхетам балара кхетаченаш. Уж ювзаенна я наьна мотт, ӏадаташ лорадарца, моттигерча ӏаьдала, юкъарлон моттигаша шоайла бувзам лелабарца, вай мехкахой хьашташ кхоачашдарца.

- Мишта хургья аьнна хет Хьона, итт шу кхы даьлча, Новгородера Гӏалгӏайчен юкъарло?

- Итт шу кхы даьлча, сона хет шахьара дакъа хинна дӏаоттаргйолаш санна. Тхо «хьаьший» хургдац Новгорода лаьтта, тхо хургда массаболча бахархой санна бокъонаш йолаш, паргӏатта тха бераш дешаш, шоай мотт лебеш хургда. Новгорода музейшца, кагирхошца цхьана проекташ хургья тха, чӏоагӏлургья Гӏалгӏайчен центр. Керттердар хургда, моттигерча наха гӏалгӏачох цӏаккха ца яйна тамаш хетаргьяц, цох лоалахо, предприниматель, е балха новкъост хургва, мехка хургдолчунца уж цхьана бувзабеш. Тхох хургда бувзама тӏий.

Лоацца биографех:

Бохтаранаькъан Руслана Къамбулат ваьв 1988 шера тов бетта 4-ча дийнахьа НГӏАССРе. Тӏехьагӏа из ваха дӏавахар Новгородски областе, цига юкъера дешар дийшар.

Ишкол яьккхачул тӏехьагӏа из деша эттар Тверерча лорий вузе. Деша вагӏаш спортивни вахара оагӏув лоацаш вар, дукхагӏча даькъе бокс, иштта цо дакъа лоацар мехка юкъарча вахаре.

Лакхара дешар дийша ваьлча, Къамбулата ший доалара болх лелабир Твере. Цунца цхьана, болх бешше, Гӏалгӏай Республикерча юриспруденце даькъ тӏа юридически дешар дийшар.

2022 шера из хьожавир Гӏалгӏай Республикан Новгородски областерча массазарча викала дарже. Карарча хана из ва Гӏалгӏайчен Кулгалхочун, Паччахьалкхен хьашташ Новгородски областе кхоачашдеш.

Из чувоагӏаш ва Ассамблея къамий Кхела, иштта цо къамаьл ду гӏалгӏай диаспора кулгалхо волаш. Ший балха чудоагӏаш цо дакъа лоац Сийлахь-йоккхача Новгорода юкъарлон-политически хьашташ кхоачашдеча, ӏаьдалца, юкъарлонца бувзам лелабеш.

Цо иштта дӏахьу ший доалахьара болх. Цун керттера лостамаш - мухь дӏа-юха кхахьар, наькъаш хьалдар. Цунна лоархӏаме да, доалахьара болх а, паччахьалкхен болх а шоайла накъабоалаш хилар, мехкашта юкъера бувзам лелабар.