- Залина, дувцал тхога, мишта дӏайолаелар хьа бизнес? Нускалашца дувзаденна гӏулакх доаржаде мишта, маца дагадехар хьона?  

- Ма дарра аьлча, дуккхача кхыдолча хӏамашка гӏолла чакхдаьлар тхо, цу оагӏонга кхачале. Бакъда къаьстта дизайнерски оагӏонца дикагӏа аьттув боалилга теркалдир оаха. Сай бераш ишколе ухача хана, цхьацца кхетаченашка царна эшаш дола барзкъаш айса кийчдора аз, массане бӏарг тӏаотташ, теркалдеш а хулар уж. Ший тайпара йола хӏамаш хьаеш чӏоагӏа тоам хулар са дега; из гӏулакх, дукхача хана денз, дезаденна яр со. Хӏаьта бизнесацара истори тӏоаргацашкара дӏадоладелар. Тха гаргара йиӏиг яр, маьре йодаш. Цун совгӏаташ кийчдеш, тӏоаргацаш вай къаман гахьар юкъе долаш кийчде безам хилар тха чӏоагӏа. Берригаш цецбоалаш; боккха, хоза болх хилар цох. Цу хана денз, уж хьадеш, дохка доладелар тхо. Тӏоаргацаш вай мехка санна, лоалахарча мехкашка бахархоша тӏехьа дӏаийдора. Берригача дезалца из болх дӏахьош дар тхо. Цхьа ха яьлча, тхоашта эшаш дола кӏада ийца, нускалашта лаьрхӏа массехк коч хьайир оаха, циггара дӏадоладелар тха хьамсара гӏулакх, тха берригача дезала бизнес.

- Чокхи тега, европейски коч хьае мел ха езаш хул шоана?

- Хӏара кочага хьежжа хул дӏайодаш йола ха а. Цхьан беттагара шин беттага кхаччалца болх бе безаш а хул. Цхьайола кочамаш массехк ди мара ца доадеш тийге йоал, хӏаьта цхьайола коч тега бетташ деза. Дизайнага, догамга, тӏера тоаярга хьежжа да из.

- Шун болх чӏоагӏа лоархӏаме хет сона, хӏана аьлча нускалаш кийчдеш ма дий шо, хӏаьта хӏара кхалсаг маьре йодача дийнахьа геттара хоза хила ловш хул. Мишта вӏаштӏехьдоал шун хӏаранена товр де, царна дезар харжа.

- Тхона чӏоагӏа лоархӏаме ба тхоаш долча тӏалатташ бола нах. Шоай вахаре эггара лоархӏамегӏа дола ди ма дий цар тхоца дувзар. Эггара керттердар – царна фу деза хар, деррига а боаггӏача боараме кхетадар, хьатӏаэцар. Нускала когаметта ше оттаве ха деза из болх лелабеча сага, тӏаккха дикагӏа кхетаду деррига. Чокхи хоржаш йола йоӏ чӏоагӏа сагота хул цу дийнахьа; ше мишта хургья-хьогӏ, товргдий-хьогӏ ше хержа чокхи, яхаш. Ма дарра аьлча, массарел хозагӏа хила безам боагӏа цун цу лоархӏамеча дийнахьа. Тхоашта хетар цунна качдолла ца гӏерташ, цунга ладувгӏа, цо яхар кхетаде хьож тхо. Хӏара нускал, хьадоагӏача хана, чӏоагӏа сатем байя хул, хӏаьта дӏадодача хана юхь елаш, дог доассаделе дӏадода. Ишттача хьала тӏа из дӏатӏадугаш хила беза тха болх. 

- Дукха ха йоацаш, Aynaeva Weddӏng (cаг йоалаяр) оала наха къерда моттиг кхыча гӏалгӏай цӏихезача (Gvӏletӏ, Pkhamat) шин моттигаца Парижера Цӏенхаштарча Модан Кӏир долаш дӏайовзийтар. Халкъашта юкъерча моданна хетаяь, къаман культура йовзийташ йола кхетаче яр из. Шоана малагӏа пайда хилар цох, вай мехка диканна дий из?

- Вай республикан керда хӏама довзар да из… Париже хиннача цу гойтамо дохадир, гӏалгӏай культура духхьал теӏа хӏама мара дац яха дош! Vogue дунен редакторашта хӏанз хов вай хӏама ший тайпара кӏоарга йолча говзалца хьакхелла долга, цхьаннегара хьаийца, ло баьккха доацаш, воаш кхоллаш долга. Хӏаьта тха салона боккха аьттув ба из вай дизайнерашцара болх дикагӏа, майрагӏа дӏабахьа. Хьалхагӏа нускалаша «туркий мехкарий яраш санна» яьхаш дистараш кхийладале, тахан «Aynaeva яр санна» оал. Хӏаьта тхона из доккха совгӏат да.

- Франце долхаш кийчдалар мишта хилар шун?

- Оаш дикагӏа кхетадергдолаш, ма дарра дувцаргда аз. Биъ бетта кийчо еш хилар тхо. Керттердар ахчанца дувзаденна дацар, вай къаман оамалашца, ӏадаташца дувзаденна дар. Париже духхьал кочамаш ийца долхаш дацар тхо, Гӏалгӏайчен дакъа, хоза оагӏув бар оаха цига хьош хиннар. Кочамашцара хӏара хӏама цкъа вайцига, тӏаккха Франце терко еш хьакхоллаш дар. Ди, бийса ца къоастадеш, болх беш дар тхо, хӏана аьлча шин сахьата башхало яр цигарча, вай мехкарча хана юкъе. Мичча хана телефон хьатехача, кийча хила дезаш дар тхо. Хала дар, дале а чаккхенга хьежача ла мегаргдолаш дар.

- Набарах хьегаш йоаяь дукха бийсаш, къахьегама денош, дукха низ, хийла дог эккхар а латт хӏара толама тӏехьа. Шоана новкъостал дераш, оагӏув хьаллоацараш барий цу наькъ тӏа?

- Цу берригача къахьегама лард – са дезал. Сона уллув болаш, со чакх мел яьннача хӏамах чакхбаьннаб уж а. Са оагӏув хьаллоацаш хиннаб уж массахана. Цудухьа са жоп – цхьа саг вац, беррига дезал ба! Геттара хала долча хана а, сона низ телаш, догьэккхара гарга хилча а юхь елаш, балха дӏааха гӏо даьд сона цар.

- Aynaeva Weddӏng яха моттиг тахан вай мехкарашта юкъе санна Кавказерча кхыдолча къамашта юкъе а дикка цӏихеза я. Кхыча мехкара нах хулий шо долча баьхке?

- Кхыча мехкарча наха юкъе а дикка бовзаш ба тха болх, цӏи дӏахузай. Кхыметтел Швейцарера, Францера, Германера нах хул, тхоца бувзаме бувлаш. Моллагӏча нускала аьттув балац тхо долча хьакхача, цудухьа цу гӏулакха духьала а дикка кийчо яьй оаха. Оаха дӏатӏадахьийтача сурташка, видеога хьожаш ший «бустамаш» хьадайт нускала, хӏаьта оаха цун дегӏага хьежжа коч хьатег. Атта-м дац иштта болх дӏабахьа, саг ше хьавена хьожаш санна, деце а дикка къахьийга хьатоабаьб оаха из болх. Хӏара сантиметр кхозза юхаюст тха болхлоша, видеогойтаме гӏолла бувзаме болаш, деррига нийсдеш къахьег. Еррига уйла дӏатӏаяхийта бе безаш болх ба из, гӏалатвалар яхар укхаза хила йиш йолаш дац, цудухьа деррига а массехказа юха дусташ, тохкаш къахьега деза.

- Вахар иразе деш йола къайле йий, хьога хаьттача, укх дунен тӏа? Нагахьа яле, ӏа фу аргдар цох лаьца?

- Аз дукха лийхай из къайле. Тайп-тайпарча оагӏонашка гӏолла, иразе долча вахарга бода никъ лаха хьийжай. Хӏанз машин ийцача ираз хургда са, тӏаккха шоллагӏа салон хьайийллача хургда ираз, аьнна, хетар сона… Из иштта дац. Сога хаьттача, ираза къайле яц… Аз сайца чӏоагӏдаь цхьа хӏама-м да, вӏалла хала доацача хӏамаех латташ: сай моттиге хилар, уллув оагӏув хьаллаца нах хилар, зӏамига да аьнна доацаш, моллагӏча доккха доацача хӏамах гӏадваха, доаккхал де хар.

- Залина, баркал хьона хьай балхах иштта дукха хӏама довзийтарах, тхоца ха йоае раьза хиларах! Иразе, аьттув болаш, беркате хилба хьа болх, кхы а дукха толамаш хилда хьа вахара наькъ тӏа!