Ахчан таронашка диллача, шахьара хьал во латтац ала йиш йолаш да, шоаш беча пайдах кхоачашъяь план 85,3% я. Керттера терко администраце тӀаяхийтар къайлагӀа лелаеча бизнеса. Рейдаш дӀахьош гучадаьлар 120 коммерчески моттиг хилар болх беш, уж лаьрххӀа бартчӀоагӀо янза я. Карарча хана уж Ӏаьдала бокъоно дӀадехача беса дӏаязъяьй, шоай болх законах лелабергболаш.

Шахьара инвестицей оагӀонна тӏакхийтар, таханарча заман наьха фусамаш, иштта керда автовокзал хьалъяра йола проекташ, цунга дӀадода 20 млн ахча. Шахьара экономикан керттера чӀоагӀо я промышленни оагӀув: ЖКХ, транспорта, топпара гӀирсаш арахецача даькъ тӀа къахьегаш ва 1300 МагӀалбика вахархо.

Доккхий хувцамаш хилар коммунальни, наькъаш деча даькъ тӀа. Дӏадахача шера МагӀалбике тоадаьд 6,7 км наькъаш, керда ӏодаьхкад 1,87 км керда гӏашлой наькъаш, ӏоегӏай 345 ток кхоеш йола сердал. «Шахьара дика хьалаш» яхача къаман проекта чудоагӏаш балхаш дӀадихьад, Дмитрова, Юбилейни, Бериславске урамаш тоадаьд.

Мэре керттерча балхах цаӀ ба, лаьрххӀача тӀема операце бӀухой дезалашта новкъостал дар. Царна лаьрхӀа 40 лаьттан дакъа хьакъоастадаьд, цига хьатӀаденад хий, ток, бӀеха хий дӀауха моттиг кийчъяьй. Цул совгӀа, администраце Ӏалашо ю массайолча оагӀорахьара: гуманитарни мухь лоаттабеяча, лорий новкъостал деча, иштта санаторно-курортий моттигашка могашал тоаеш гӀо деча.

Ший аргӀагӏа, Келаматанаькъан Махьмуд-Ӏаьлас белгалдир, МагӀалбик, 40 эзар саг вахаш, тӀема сийлен шахьар хиларах тарра, даим а терко лоаттае езарех я, цо дӀадех наьха вахара хьалаш дика хилар. 2026 шера де лаьрхӏачох да унахцӀенон, дешара даькъ тӀара болх тоабар, иштта шахьар дӀахо тоаяр, из кхы тӏа а чӀоагӀагӀа кхерамзлен Ӏалашо йолаш а, бахархошта дика хьалаш долаш а хургйолаш.