Моттигашкарча массазарча викалий керда декхараш
Вай республикан арахьара викалаш, СВО доакъашхой дезалашта гӏо дара тӏаэзар Мехкадас
Российски Федераце моттигашка болх лоаттабеш болча республикан массазарча викалашца лоархӏаме кхетаче дӏайихьар мехкадас Келаматанаькъан Махьмуд-Ӏаьлас Магасе. Кхетаче дийцача керттердарех дар, хьакимаш тайп-тайпарча моттигашкарча викалашца массахана бувзаме хилар, кхыча моттигашта хьалхашка вай мехка хьал боаггӏача боараме лоаттадар, вахара-экономически оагӏонцара лоархӏаме декхараш кхоачашдара тӏехьа къахьегар.
Вай мехкадас Келаматанаькъан Махьмуд-ӏаьлас белгалдир, викалаша дӏахьош дола гӏулакх вай республиках хила безача тешамца бувзам болаш долга. Из оагӏув хьаллоацаш Мехкадас теркалдир, Украинерча тӏема операце доакъашхой дезалашта новкъостал лоаттаде дезилга. Вай республикан цӏерах къахьегарашта тӏадиллар, Мехкадаь, Паччахьалкхен Администрацеца бувзам дикка чӏоагӏбар; вахара, унахцӏенон, лаьттан доазошца дувзаденна дола хаттараш доашхаш, къоастадеш тӏехьа болх лоаттабар. Республикан кулгалхочо белгалдир, тӏема аренашка вахар хаьдача бӏухой гаргарча наха къаьстта йоккха терко лоаттае езилга массахана, паччахьалкхе шоай гӏулакхага хьожаш йолга кхетадеш, ховш хила беза уж нах.
Вӏашагӏкхетаре иштта дийцар мехкарча экономически оагӏонцарча хьалах, арахьара рузкъа мехка экономика юкъеозарах. Мехка кхыйолча моттигашка, вай республикан инвестиционни оагӏонцара болх боаржабара тӏехьа кхоачашде дезарех дийцар гулбеннараша. Вай Мехкадас белгалдечох, кхыча моттигашкарча инвестораштеи вай бизнеса оагӏонаштеи юкъе бувзам хилийтара тӏехьа къахьегаш хила беза викалаш. Ишттача наькъаца вай республике цу оагӏонцара керда гӏулакхаш, бизнес йоаржае аьттув хургба.
Кагирхошцарча балхах, кадрови политиках дийцар кхетаче. Келаматанаькъан Махьмуд-Ӏаьлас хьоахадир, кагирхой ма хулла юкъарча оагӏонцарча гӏулакхашта чуозаш, Россе лакхерча дешара моттигашка уж деша увттаргболаш, къахьега дезилга. Хӏаьта цу оагӏонца эггара керттердар да, аьнна, теркалдир Мехкадас, дийша баьнна цхьацца говзал караерзаяьрашта, республике болх бе моттигаш хилийтар, хӏана аьлча начӏал дола, къахьега ловш бола кагирхой шоай мехка накъабоалаш, республикан хьал тоадара тӏехьа болх беш хила беза.
Кхетаче йистейоалача хана, белгалдир Келаматанаькъан Махьмуд-Ӏаьлас вай къаман культураца, ӏадаташца дувзаденнараш хозача оагӏорахьа хьаллоацаш, кхыча моттигашка дӏадовзийташ болх лоаттабар дика долга. Мехкадас хьоахадир, гӏалгӏай къаман дӏаьхий дола истори, культура, таханарча кхоллама оагӏонца дувзаденнараш дикка доаржадеш болх лоаттабе безилга. Хӏаьта викалаша дийцар, регионашта юкъера бувзам, барт хьаллацара, чӏоагӏбара тӏехьа къахьегаш шоаш кхоачашдеча гӏулакхех, иштта цхьацца проекташка гӏолла лоаттабеча балхах.
