Мехка хӏама чӏоагӏдара тӏехьа, къахьегаш ба тахан
Келаматанаькъан Махьмуд-ӏаьлас Госсовете дийцар, вай республикан толамех
РФ Президента Путин Владимира кулгал деш, Российски Федераце Паччахьалкхен Кхеле дӏайихьача, укх шера тӏеххьарча кхетаче дакъа лоацаш хилар вай Мехкада Келаматанаькъан Махьмуд-ӏаьла. Йоккхача кхетаче дийцарашта юкъе, керттера моттиг дӏалоацаш дар, хьакхеллача хьаькъалца дувзаденна хувцамаш даьржача таханарча хана, мехка технологически оагӏонцара хӏама айдергдола, меттадоаладергдола къахьегамхой кийчбар. Из хоам «Сердало» газетага бир Мехкадаь, Паччахьалкхен зарбан болх лелабераша.
Респуликан Кулгалхочо аьлар, Президента белгалдаьраш вай мехка хьаллоацаш хиларах. Тахан мехка геттара чӏоагӏа эшаш ба инженерни, кхоллама оагӏонцара лакха говзал йола, тоабанца болх дӏабахьа ховш бола къахьегамхой. Хьакимашта, бизнеса, дешара моттигашта юкъера бувзам чӏоагӏбеш, болх лоаттабу мехка.
Къаьстта йоккха терко тӏалоаттаю мехка экономикан керттерча оагӏонашта – доагора-энергетически, хоамий технологешца, агропромышленни, гӏишлон балхашцарча оагӏонашца боаггӏача боараме къахьега ховргдола болхлой кийчбара тӏехьа. Дикка хӏама тоадеш хилар Россе Президента йоаржаяь «Кагирхойи бераши» яха къаман проект, «Профессионалитет» яхача федеральни проекте дакъа лацар вай мехко.
Мехкдаьттан-газа оагӏонца дӏакхийтар вай республика цу проектах 2025-ча шера. Лоархӏаме да мехка дешара гӏулакх таханарча хано дӏадеххача тайпара дӏадахьар. Тахан вай мехка болх дӏахьош бола говзанчаш кийчбеш шиъ моттиг я, кхетама хьал чоагӏдеш йола кхо моттиг, WorldSkӏlls оагӏонца кийчъяь лакхача боарамера 11 пхьоалле.
Республикерча 100% колледжаша шоай болх таханарча дийнахьа мехка эггара чӏоагӏагӏа эшараш малагӏа болхлой ба тохкаш дӏахьош ба, цунга хьежжа да студенташ хьачуийбара гӏулакх а. Вай мехкадас Келаматанаькъан Махьмуд-ӏаьлас белгалдир, цхьана къахьегарца, мехкарча кагирхошта аьттув лургбола моттигаш йоаржае, хӏаьта ерригача Россе экономиканна лакха говзал, начӏал дола къахьегамхой кхебе вӏаштӏехьадаргда вай, аьнна.
