«Сердало» газето хьалхагӏа белгалдаь хиларах тарра, театра, кинон, кердадарий оагӏон лакха начӏал, говзал йолча артисташка гӏолла вӏашагӏбелла болх ба из. Массанена езаенна йолча цу спектаклага хьажа аьттув хургба бахархой, хьаьший укх бетта 21-ча, 22-ча, 23-ча деношка. Даьша йитача тӏехьаленах, къаман селханарча, таханарча вахарах дувцаш бола лоархӏаме болх ба гойташбар. Къаман тхьоврача хана денз; вай даьша, ноаноша лорадеш хьадена ӏадаташ, бӏаьшерашка денз гӏалгӏашта юкъе чӏоагӏъенна латта оамалаш, иштта тахан хьадаьнна кердадараш довзийташ я спектакль. Гӏалгӏай къаман истори геттара хоза гойташ бола болх ба оттабаьр.

Вай даьша етта кура гӏалаш – мехкахой денал, яхь, къонахчал, сий лораде хар гойташ бола оагӏув. Цунга хьежжа, духхьала гӏалаш хиларал совгӏа, къаман культуран «дӏоагӏа» лораду, дӏадахача бӏаьшерий деной тешаш хинна латта боккха низ бола оагӏув болаш хьокхаргья уж спектакле. Лакха начӏал долча артисташа чӏоагӏа къахьийгад; из беррига болх мехкахошта, иштта хьаьшашта безалургболча тайпара кийчбе хьожаш. Хӏаьта тахан из цар дика вӏаштӏехьадаьннад ала йиш йолаш да вай майрра. Гӏалгӏай къаман культура, цу оагӏонца дувзаденнараш, исторе лоархӏаме моттигаш, цхьаккха хӏаманца хувца йиш йоаца, сий долча даьша хьеракӏиг санна лорадеш хьакхачийта ӏадаташ; къаман беркате, хоза оамалаш; иштта кхыдола лоархӏамедараш довза аьттув ба спектаклага хьажа боагӏаргбарий. Из-м духхьала цхьа хоза сурт хинна ӏац, ший овла бовза безилга, даьшкара къонгашка кхоачаш дахаш хинна хӏамаш хам беш лархӏа дезилга белгалдеш болх ба кийчбаьр.

«Са низ, са дог – Гӏалгӏай Гӏала» яхача спектаклага хьажа берригача дезалца арабовлар; царна массанена пайда беш хургда, аьнна, хет. Хӏана аьлча моллагӏча ханага кхаьчача сага кхетадергдола, лерхӏаме дола хӏамаш да цу юкъедихьараш. Даьшкара хьакхаьча ӏадаташ деза долча боккхагӏбарашта, кхолламца шоай дега уйла йоаржае ловш болча къонабарашта хоза хьокхам ба ала йиш я цох. Зӏамигавар а воккхавар а хьажа везаш, дӏа-хьа йоаржае езаш проект я из аьлча, харцахьа хургдац тахан; хӏана аьлча массанена хьаэца масал долаш болх ба из. Культуран оагӏонцарча вахарера къайленаш, цхьаццабарашта тамашийна хетараш довзийташ къахьегам ба из.

Белгалде лов вай къонача артисташа хьинаре, лакхача говзалца къахьийгалга. Къаман вахаре массахана даха дезаш, лерхӏамца хьаллоацаш доаржаде дезаш дола хӏамаш да чулаьцараш. Тахан вайх хӏаране кхетаду кура бовхьаш дола, лакхера берригача мехка тӏахьожам беш, деррига зувш, бӏаьшерашка денз лоаман аренашца гаргало хетта латта гӏалаш, къаман исторе лоархӏаме моттиг дӏалоацаш, лорае езаш йолга. Истори доккха хул дӏа-хьа доаржадарга, цун сий дарга хьежжа. Цунга хьежжа, тхьоврача хана денз къамо хьабена никъ, лайна халонаш, фуннагӏа духьалдаларах ӏо ца дохкаш лорадаь гӏулакхаш довзийташ бола болх вай дегашта боккха тоам беш хургба. Лакха начӏал долча актёрашка гӏолла из деррига юха а довза аьттув ба вай.