Толамга кхувла керда никъ
«Дегӏаахара синпха» яхача сессе дакъа лоацаш хилар вай мехкара хьехархо
«Дешара оагӏув» яхача моттиго вӏашагӏъелла, «Хӏама тоадара оагӏув» яха сесси дӏайихьар Пятигорске «Машук» оалача дешара керттерча моттиге. «Сферум» яхача таьрахьашцарча дешара платформа хьалха латташ вола 60 доакъашхо гулвелар цига. Дакъа лоацаш хиннарашта юкъе яр «Сферума» болх дӏахьош йола Базорканаькъан Хадижат. Кхаь дийнахьа йоаржаеш хиннача программан юкъе белгалдир дешара оагӏонца тахан хьадаьржа дола кердадараш, цу оагӏонцара болх цхьаккха кхоачамбоацараш доацаш дӏабахьарах дийцар. Таьрахьашцарча оагӏонцара дешар вай мехка боаггӏача боараме хьаоттадара тӏехьа къахьегарашта юкъера бувзам чӏоагӏбеш, цхьаццадараш дӏа-хьа эцаш, цу оагӏонцарча балхаца керда наькъаш хьаделлаш моттиг хилар цох.
Хьалхарча дийнахьа «Машук» моттиг йовзаш, тоабанцара болх тоабеш, кхоллама оагӏонца къахьега кийчо еш хилар доакъашхой. Медиастуде шоаш дӏахьокха, эггара лоархӏаме да аьнна хетараш белгалдеш, къамаьл де аьттув баьлар доакъашхой. Цу кхетаченах, берригача балхах шоашта хетар, шоаш теркалдаьр белгалде аьттув лора студе. Гуш дар берригаш къахьега, кердача наькъ тӏа баьнна цу оагӏонцара болх боаржабе ловш болга.
«Сферум» платформа болх боаржабара, хьаллацара тӏехьа малагӏа гӏулакхаш белгалде деза кхетадир дакъа лоацаш хиннараша. Цу оагӏонцара болх тайп-тайпара дӏабахьа йиш йолгах, класса кулгалхочун, предметника, берий беша хьехаш барий балха юкъе малагӏа къоастам ба дийцар царга. Платформа болх дикка бовза ловрашта хьаэца дукха хӏама долаш моттиг я ала йиш яр цох. Хьехархошта лаьрхӏа йолча сайташцара, администратора доалахьарча кабинетацара, иштта викторинаш, кхыдараш хьакхоллаш болча балха юкъе теркалде дезараш малгӏаш да белгалдир кхетаче. Цу оагӏонцарча говзанчаша терко йир хьакхеллача хьаькъалга гӏолла из болх дӏабахьара, иштта хьехархой болх из юкъелоацаш дикагӏа хьаоттабара.
Сессе тӏехьара ди чӏоагӏа лоархӏаме йола тема чулоацаш дар – кхерамзле. «Сферума» методологех болча оагӏон хьалха латташ йолча Вартанян Верас аьрахьий даькъе кхераме доацача тайпара болх дӏакхахьарах йола доклад йийшар цига, белгалдир вахара оагӏонашка лораде дезараш. Дӏахо, тоабашца болх дӏахьош шоай проекташ йовзийташ къахьегаш хилар доакъашхой. Проектий болх бераш интернета оагӏонашка лораде дезарца бувзабенна бар, шоашта хетар кхелахошта а довзийтар цар.
Из кхетаче вӏашагӏъеллараша дикка къахьийгадар Берригаш раьза болаш хилийтара. Ма дарра аьлча, шоай истори хьакхоллаш, довзийташ хилар доакъашхой цу массехк дийнахьа. Кхетаченах лаьца видео хьакхеллача вай мехкахочо Базорканаькъан Хадижата «Сферума» Медиастуде яхьашка котало яьккхар. Сессеца дувзаденнараш боаггӏача боараме, таханарча хано дӏадеххача тайпара дӏахьокха аьттув баьлар цун. Цу сессе дакъа лацар боккха пайда боаржабеш хилар гулбеннарашта юкъе. Кердача тайпара декхараш кхоачашде ӏомалуш, шаьрдаьр дӏа-хьа эцаш, дикагӏа хургда аьнна хетараш белгалдеш къахьийгар массане. Беррига доакъашхой чӏоагӏа раьза болаш, дӏадахар къахьегама денош.
