«Кхоанен культуран дӏоагӏа» яхача проектага гӏолла къамий лоархӏаме ӏадаташ, беркате оамалаш, культура хьаллоацаш болх лоаттабу мехка. Белггалара лостам бола сайренаш дӏакхухьаш; сийрда, цӏена гӏулакхаш доаржадеш бола болх ба адам вӏашкаозаш дӏахьошбар»,- дийцар «Сердалога» Гӏалгӏайчен массазарча викалаша. Москве «Рамадана чаьтар» хьаделлар чӏоагӏа лоархӏаме гӏулакх да, цига бахаш болча бусалба наха. Хӏара сайрахьа цхьана марха доасташ, дийшача наха хьехам беш, бусалба динца лораде деза лоархӏамедараш белгалдеш, вӏаший барт, безам чӏоагӏбергбараш доаржадеш болх латтаргба цига. Россе бусалба дин леладеш дукха къамаш, дукха адам да, цар массане юкъара моттиг я из. Вай мехкахоша шоай къамаьла юкъе белгалдир, иштта йолча кхетаченаша бусалба наха юкъе боккха пайда, доккхий дикаш доаржаделга. Къаьстта лоархӏаме да из къонабарашта.

«Вай къаман кагирхой «Рамадана чаьтаре» дакъа лоацаш хилар дега тоам беш да тахан. Кхыдолча къамийцй культура, цар гӏулакхаш, ӏадаташ довза аьттув ба цар, цхьацца беркате дола гӏулакхаш, оамалаш дӏа-хьа эца йиш я. Юкъера бувзам ишттача наькъаца чӏоагӏлу, хӏаьта из лоархӏаме да тахан»,- дийцар тхога. Гӏалгӏайчен викалаш - кагирхой оагӏонцара хьинардараш «Рамадана чаьтаре» марха доастийтача гӏо деш, Даьла духьа дӏахьош йолча проекташка дакъа лоацаш, беркате кхетаченаш еча гӏо деш хургба. Царна юкъера цхьаццабараш эггара хьалха дакъа лоацаш ба цу тайпарча моттиге. Мархий бутт чакхбаллалца латтаргда «Рамадана чаьтар» Москве. Массехк эзар Москвера бусалба саг, иштта хьаьший хургба цига дакъа лоацаш. Тайп-тайпарча къамай нах цхьана марха даста ховшар, бусалба динцара хӏама лакхдар, вӏаший барт, безам чӏоагӏбар Даьла раьза хургволча гӏулакхех да.

Цу проекто цӏаькха а хьагойт вайна, Москва ерригача Россе моттигашкара бусалба нах цхьанкхеташ, вӏаший безам боаржабеш йола моттиг йолга. Беркатеча гӏулакхашта тӏехьа аьттув хилба бусалба адама! Аллахӏ раьза волаш хилда вай лерхӏамаш, вай дегай хьал!