Иштта дӏахьоча кхетаче МВД хьакимашка гӏолла моллагӏа хаттар дашха, шоашта кхъувларашка гӏолла тохкам бе аьттув ба бахархой. Цудухьа йоаржаеш я иштта йола кхетачеш. Къаьстта йоккха терко еш дувцаргда кхетаче наркомани яхача бӏехача зулама духьала къовсам лоаттабарах.

МВД болхлоша дувцаргда тахан вай мехкарча хьалах, наркотик яхача дохьажаца бувзам лелабераш, из наха юкъе йоаржаераш гучабахара тӏехьа малагӏа дакъа лоацаш хила беза бахархой.

Къаьстта чӏоагӏа лорабе беза вай цу доккхача зуламах тахан къонабараш! Дезале, ишколе, кхыйолча моттигашка из хӏама вайна юкъера дохадаь дӏадоаккхаргдолаш малагӏа болх лоаттабе беза белгалдергда кхетаче. Гулбеннарашта хьалхадоаккхаргда, дас, нанас шоай дезала геттара лакха терко, тӏахьожам лоаттабе безилга, шоай дезалхо мичахьа лел, хӏанца ва, малагӏа гӏулакхаш кхоачашдеш ва ха декхарийла бараш уж ба! Цунга хьежжа эггара керттера болх цӏен юкъера дӏаболалуш ба.

Хьехархоша, даьша, ноаноша, юкъарлон институташа, ӏаьдала болхлоша цхьана болх дӏахьош духьале е езаш бӏеха зулам да из. Иштта кхетаче дувцаргда наькъашкара бокъонаш лораярах.

Наькъашкара хатараш ма хулла лаьгӏдара тӏехьа къахьега дезаш да вай дерригаш, машинаца, гӏаш аравоалача саго эггара хьалха лораде дезар- наькъашкара бокъонаш лархӏар, фийла хилар, ший, иштта гонахьарча наьха уйла еш хилар да.

Къаьстта лораде деза из гӏулакх дешара моттигашта гарга кхаьчача. Дешара шу дӏадоладалар хьатӏаэттад тахан, цунга хьежжа никъ биззий бераш хул, из кхетадеш геттара фийла хила беза машинашца лелараш, бера хӏара дийнахьа цӏагӏара арадоалача хана хьалхадаккха деза дикка дӏа-хьа хьежа мара наькъ тӏа ког дӏатӏабаккха йиш йоацилга, массахана светофорага хьожаш хила безилга.

Цул совгӏа гулбеннарашца дувцаргда мехкарча МВД балха оттара гӏулакхах. Цига къахьега ловш барашта ха дезаш мела дола хӏама белгалдергда цар, иштта дувцаргда Россе МВД моттигашка деша оттара гӏулакхах, кийчо ярах, ӏаьдалгара тӏема декхараш кхоачашдеш болча наха хьадоагӏача хӏамах. Цу оагӏонца дувзаденнараш довзар лоархӏаме да къонабарашта, хӏетта дийша баьнна ишколера арабаьннарашта. МВД ший вахар хеттача сага ший балха тӏа дикка лакхвала, гаьнавала аьттув болгах дувцаргда кхетаче.

Яндаре бахача наха къувлараш , тахан цар вахарера кхоачамбоацараш довзаргда МВД болхлошта. Хӏара моттига ларах тохкам бе хьожаргба уж. Тахан интернета оагӏонашка геттара чӏоагӏа баьржа, нах лебеш болча зуламхоех лораваларах, тешаме боацача, малаш ца ховча нахаца бувзам лелабе йиш ца хиларах дувцаргда ӏаьдала болхлоша. Юртарча наха участковеца бувзам лоаттабар лоархӏаме долга белгалдергда кхетаче. ӏаьдала болхлошта, бахархошта юкъе массахана бувзам хиларо моллагӏа кхоачамбоацараш, хьаштдоацараш дикагӏа гучадоах.

Юртара кхерамзлен хьал лорадара тӏехьа къахьега дезаш ба берригаш, цунга хьежжа моллагӏа зулам теркалдаь моттиг хилча ма хулла сихагӏа хоам беза МВД болхлошка. МВД, бахархошта юкъера моттиг чӏоагӏяра, тешаме хилийтара тӏехьа лоархӏаме кхетаче я Яндарерча культуран Цӏагӏа дӏаяхьа езар.

Таханара къона тӏехье воча, зуламе долча гӏулакхех лораяра тӏехьа, уж нийсача наькъа тӏахьехарца , зуламаш юкъера дӏадахарца чӏоагӏа лоархӏаме болх ба из ала деза тахан. Каст-кастта иштта кхетачеш дӏакхухьаш хиларо наьха кхетама хьал тоаду, шоашта ца а ховш доккхача зулама юкъе нийсбала тарлуш хиларах лорабу, моллагӏча моттиге шоай фу де деза, мишта хьовза беза ховш хул бахархой.

Белгалде деза иштта йолча кхетаченах боккха пайда хьабоалилга! Вахаре эггара керттерадар воча, бехктокхаме озаргволча гӏулакхашта юстара хилар, бӏеха хӏама ца даржийташ ма могга духьале лоаттаяр, зуламхой гучабахар, цар наькъаш тедар да, цунга хьежжа дӏакхухьаш аргӏанара болх ба из МВД.