«Кулгалхошта, болхлошта юкъера моттиг тоаеш, ма дарра аьлча, бувзам чӏоагӏбеш хургья тоабай чӏоагӏо. Къахьегаш болча наьха бокъонаш хьаллоацаш, деррига а хила деззача тайпара дӏаоттадеш дола каьхат да из тахан»,- белгалдир профсоюзий оагӏонна хьалха латтача Оздой Хаде. «Къахьегама ветеран» яха цӏи сага яларца цхьацца хувцамаш юкъедаха деза, аьнна, хьоахадир профсоюзий оагӏоно. Цо белгалдечох, вӏалла паччахьалкхен оагӏонцара совгӏаташ тийнадеце а белгалвеш, саг дуккхача шерашка къахьегаш хьавоагӏаш вале, из цӏи ялар нийса да. Иштта дийцар, болхлой лорашка чакхбалар, дегӏа могашал меттаоттае йиш хилар тахан аттача даккхар. Къилбаседа Кавказерча санаторешца, курорташца бувзаме ваьнна, дувца дезаш хӏама да къахьегачарна, цар цӏагӏарча наха моттигаш ялар гӏулакх тоадар. Къаьстта йоккха терко йир АО «Ингушнефть» кагирхоша юкъарлон оагӏонцарча балха юкъе дакъа лацара. Хьинардараша дийцар, къона болхлой оагӏув хьаллоацаш программаш йоаржае еза, аьнна, из деррига эшаш да уж шоай гӏулакха тӏа дикка лакхлургболаш.

«Вай моттига хӏама боаггӏача боараме тоадара тӏехьа баьккха лоархӏаме гӏа ба бартчӏоагӏам оттабар. Профсоюзашца цхьана болх дӏахьош хиларо доккхача дикашка кхачара тӏехьа гӏо дергда вай моттига, иштта болхлой хӏама тоадергда»,- белгалдир АО «Ингушнефта» хьалха латтача ӏарчакханаькъан Ахьмада. Из кхетаче беркате, боккха пайда беш хиннай аьлча харц хургдац тахан. Тайп-тайпарча оагӏонашца дувзаденнараш дикагӏа кхетаде, довза аьттув хургба ишттача наькъаца, иштта болхлошта АО «Ингушнефта» кулгалхошта юкъера моттиг хила еззача тайпара тоаеш хургда хувцамаш.