2026-гӏа шу доладелча денз, ганзагара новкъостал эшаш бувзаме баьннараш 197 совгӏа саг ва. Цу юкъе ба тӏема операце ветеранаш санна, тӏема моттигашка вахар хаьдарий, де доацаш байнарий цӏагӏара нах. Йоккха гӏайгӏа, сагото тӏаена дог деха кхестача наха гӏо деш ва тахан шоай балхацара говзал дикка шаьръяь вола пхи саг. Психолого-психотерапевтически оагӏонцара новкъостал эшаш ба уж беррига нах тахан. Психологашца бувзам лелабу ветеранаш укх тӏехьарча шерашка шозза дукхагӏа ба : 2024-ча шера 12%-гара 2025-ча шера 25%-га кхоачаш да из таьрахь.

«Психологий гӏо геттара чӏоагӏа эш тахан тӏема операцена юкъе дакъа лоацаш хиннача вай къаман къонгашта; воӏ, цӏен-да дӏаваьнна е де доацаш вайна йоккхача гӏайгӏо вӏашкабихьарашта. Чӏоагӏа лоархӏаме да иштта халача хьале этта бола нах шоай саготонца цхьаь цабитар. Уллув цар оагӏув хьаллоацаш, тӏакхаьча бала царца бекъаш, могаш дола гӏо лоаттаде кийча болаш нах хила беза. Шоай гӏайгӏанца шоаш цхьаь боацилга кхетадар, гуш хилар чӏоагӏа эш цу наха. Цудухьа цу оагӏонцарча балха йоккха терко лоаттаю «Даьхен лорабой» яхача ганза респпубликерча филиала къахьегамхоша.

Тахан оаха дика кхетаду цу нахага йоккха хало йолга. Воӏа, цӏен-даьна, вешийна тӏехьа гӏайгӏа е езаш хилар дувца эттача дешай низ дӏа ца кхаччал хала хӏама да, боккха ӏоткъам ба дега»,- дийцар РФ герзашцарча низий министерствон кулгалхочун гӏонча-статс-секретарь, «Даьхен лорабой» яхача Паччахьалкхен ганза хьалха латтача Цивилева Аннас. Хӏара виълагӏа вола тӏема операцен доакъашхо психологашца бувзам лелабеш ва тахан. Лорашка чакхвоалаш, дегӏа хьал меттаоттадеш, курорте ха йоаккхаш, чӏоагӏа эшаш да психологий гӏо.

«Тӏема операце доакъашхошта психологически оагӏонцара новкъостал лоаттадар чӏоагӏа лоархӏаме, лакхача боараме дӏабахьа безаш болх ба. Из динза даргдоаца хӏама, вай массане декхар да! Царех хӏаравар терко эшаш, массахана оагӏув хьаллоацаш, дега хьал меттаоттадара тӏехьа новкъостал эшаш ва. Тӏема операце бӏухой; къонгашта, моарошта тӏехьа ди, бийса тувладенна гӏайгӏа еш; халача хьале этта бола нах шоашкара хало екъа кийчабараш уллув болга кхетадеш, гӏулакхашца из деррига бӏаргагуш хила беза. Хало тӏакхаьчача хана, эггара лоархӏаме дола хӏамаш да уж»,- дийцар тхоца къамаьл деш «Даьхен лорабой» яхача ганза вай мехкарча филиала кулгал деча Оздой Муслима. Тахан филиала ший болх хила беззача тайпара дӏаоттабаьб, дукха къахьийга. Терко йоацаш, гӏо доацаш, вусаргвац цхьаккха. Тӏема операце ветераний, цар цӏагӏарча наьха хьашташ кхоачашдара тӏехьа хӏара денна болх дӏахьош, къаьстта хержа тоабаш я.