«Ишкол 21» сайтага гӏолла чудала деза дехар 18 шерал зӏамагӏа боацараша. Ишколера дешар мах боацаш да. Кхыча моттигашкара баьхкарашта «Таьрахьашца дувзаденнарех йолча Академе» «Смарт отеле» ӏе йиш я. РФ йоалах йолча бокъонга гӏолла чӏоагӏдеш да цу отеле вахар, цудухьа НДФЛ доакъашхоша шоаш мах луш я. ИТ оагӏонца дувзаденнараш довза, карадерзаде ловш хиннарашта боккха аьттув ба таханара дешар. Шин кӏирах латтача хана «Ишкол 21» болх бовзаш, цхьацца декхараш кхоачашдеш, тоабанца бӏарччача проекташка гӏолла болх дӏахьош хургба доакъашхой. Цига хьаухарашта юкъе ба из гӏулакх хӏетта довза болалураш, юххьанцара болх байзараш, иштта лакха говзал йола программисташ. «Бассейна» дуккханешта аьттув лу ший низ, хьинар тахка, малагӏча оагӏонца болх дӏабихьача дикагӏа да кхетаде. Мехкарча тайп-тайпарча моттигашкара адам да цига тӏалаттар. Хьалха хиннача «бассейне» Россе тайп-тайпарча миӏингашкара вена 40 совгӏа доакъашхо вар.

Гуцаранаькъан Микаила, кхоанен уйла еш, деррига теркалдаь хиннилга кхетаду вай цу гӏулакхах. Республике йоккха ИТ-кластер хьаеллар боккха пайда боаржабеш хургдолга кхетадеш хиннав из. Дешарца, бизнесе, паччахьалкхен моттигашка доал деш, довза деза дукха хӏамаш ӏомадергда цига доакъашхоша. Болх дикка шаьрбе, ший проект йоаржае, дӏахо къахьегаргдолча моттиге чӏоагӏвала аьттув луш моттиг я из», - дийцар «Сердалога» «Ишкол 21» лелаеча Колой Руслана. Хьалхарча оагӏонца чакхбаьннараш керттерча курсе дӏачӏоагӏлу, итт тайпара йолча ИТ-говзала юкъера цхьа никъ хьахоржаргба цар. Цу юкъе да ПО, Data Scӏence, DevOps/SRE-инженери, киберкхермзле, QA-тестировани, бизнес-тохкам, UX/Uӏ-дизайн, биоинформатик, иштта проекташта, кхыдарашта доал дар. Цо хьагойт таьрахьашцара технологеш вай вахара массайолча оагӏонашка йолга. Дешара гӏулакх лекторех латташ дац, деррига а балхаца, тоабанца болх дӏабахьарца, моллагӏа декхар ше кхоачашде оттарца, кода тохкам барца довза йиш я укхаза. Шийн хетар дӏадовзийта, моллагӏа хӏама духьала доале цун духьала отта, халача кейсашца болх дӏабахьа ӏомаву укхаза. ИТ-оагӏонца къахьега ловш волча сага ха дезаш хӏамаш да уж дерригаш.

 Кхаь бетта ше ӏомадаьр чӏоагӏдеш хургва саг компане. Проекта керттерча сайтага гӏолла маьцхали бетта 5-гӏа ди оттале дехар чудала дезаш вар очни «бассейне» деша безам бар. Анкето яхар чакхдаьккха, геймифицированни онлайн-тест яйза, видеошка хьежа, каьхаташ хьачудаха деза шийна хӏаране. 2026-ча шерарча маьцхали бетта 10-ча дийнахьа дӏаболабир ахканарча «бассейно» ший болх.

«Сердало» оагӏон тӏара

 «Таьрахьашца дувзаденнарех йола Академи» ИТ-оагӏонцара говзанчаш кийчбеш йола «САФМАРА» хьалха латтача Гуцаранаькъан Микаила дешара проект я.

«Ишкол 21» таьрахьашцарча технологе ишкол я.  Хьалхарча оагӏонцарча балхах чакхбаьннача 18 шерал боккхагӏа мел барашта мах боацаш ИТ–говзал ӏомае аьттув луш моттиг я из. Программировани  е ховш, е цу оагӏонцара цхьаккха довзаш вац,  диплом дац, аьнна, деша отта йиш я цу ишколе. Таханарча вахаре геттара даьржараш керте лоацаш, вай мехкарча таьрахьашцарча дешара кӏийленга гӏолла дӏахьош ба дешара болх. ӏ00% цига дийша баьнна арабаьннараш тахан; Российски йоккхача ИТ-компанешка, бизнеса моттигашка балха этта; къахьегаш ба.