«Фермерий ишкол» яхача Дешара проекта чувоагӏаш агронома, зоотехника говзанчий мугӏаре ваьлар Гӏалгӏайчен 60 саг.

Карарча шера иштта керда балха лостам ӏомабе таро йолаш хургва 30 саг, царна юкъе ва лаьрххӏача тӏема операце 12 ветеран, цар дезалаш ба, льготаш хилара бокъо йолаш.

Республикан йоккхагӏа йолча агропромышленни                                                                                моттигашка гӏолла экскурсеш е лаьрхӏад 10 кӏира. Иштта цар таро хургья  доккхий боахамаш леладе, из лоархӏаме да укх заман дика бизнес дӏаяхьара.

Хӏанз кхозлагӏа Гӏалгӏай паччахьалкхен университет накъаяьлар хургболча профессионалашта. Ладувгӏаш хиннарашта юкъе шоай гӏулакх тоаде дезаш бола аграреш санна, юртбоахама гӏулакх дӏадахьа ловш бараш бар.

Буро кӏалхара Дудурганаькъан Хьусен зӏамига волча хана денз юртбоахама къахьегам дика бовзаш ва. Цар цӏагӏа даим котамаш, доахан, жа леладаьд. Цун ше гора даим юртбоахамхо волаш санна, хӏана аьлча цо яьккхай Наьсарен ахархой техникум, иштта Россе хьалхале лелаю ахархой вуз - Санкт-Петербурга паччахьалкхен ахархой  университет.

«Регионе керттера пайда эцаш да тахан дулх, тха, хьайбай нахьараш. Тха дезало леладеш дола керттера гӏулакх, ха дӏа мел йода дерригача вахаре леладеш хилар. «Фермерий ишколе» со хьавера сайна ховш дар кӏеззига кердадаккха, керда технологи ӏомае. Нагахьа санна цу тайпара таро хуле, сайна ховш дар аз дӏахьехаргда кхычарна», - аьлар фермера.

Ховш ма хиллара, хӏара моттиге специальность хорж чурча базаро дӏадехачунга хьежжа: цу тайпара, говзанчаш кийчбу хоадам болча моттигашка дӏадехар кхоачашдара. Ерригроссийски тароний кердача проекто чулоацаш я Россе 38 республика.

Гӏалгӏай Республикан Кулгалхочо Келаматанаькъан Махьмуд-ӏаьлас яхачох, юртбоахам дегӏабар, фермера болх лелабар тха балха керттердар да. Цудухьа ӏомалуш да тхо «Фермерий ишкол» яхача проекте, цо таро лу республикан бахархошта шоай ханнахьа юртбоахама даькъ тӏа шоай доалахьара хӏама дӏадоладе.

«…Къаьстта ала лов сона, кердача дешара даькъа юкъевоагӏаш ва лаьрххӏача операце 12 ветеран, иштта цар дезал. Из тха керттера декхар да. Паччахьалкхе декхарийла я турпалхошта шоаш маьхалбахара йола таронаш лоаттае, со тешаш ва из дика никъ хиларах. Гӏалгӏай паччахьалкхен университета даькъ тӏа ийца пайда накъа баргба лерттӏа фермераш хилара», - аьлар ГӏР юртбоахама, кхачан  министра Гаьгенаькъан Мухьмада.

Дийша баьннача выпускникашта хьалхашка оттадергда кастлуш предпринимателий гӏулакх леладича да бакъахьа, е мехка юртбоахам дегӏабоалабича да бакъахьа яха хаттараш. Цар бокъо я шоашта бакъахьа хетар хьахаржа лакха толамаш даха дагахьа.