«Цу боарама толам баккхар - из белгалйоалаш йола котало я, цо чӏоагӏду кӏоаргга хьаькъал хилар.  Мухьмада а иштта кхыча финалисташта а хьалхашка цу гӏулакхо таронаш хьаеллар Российски вузашка деша отта», - аьлар «Сердало» газетага Гӏалгӏайчен дешара, ӏилман Министерстве.

Тӏумхой Мухьмада Ерригроссийски «Сириус» яхача олимпиада финале дакъа лацар - из духхьал баллаш бахьан дӏахьош бола къовсам хинна ӏацар. Из, хьалхарча аргӏагӏа,  цхьаькха а боаккхаш бола гӏа бар, олимпиада хилалехь дуккха хьалхагӏа денз лаьрхӏа хиннар кхоачашдара.

Мухьмада юриспруденце дешара оагӏон безам тӏабахар цӏаьхха хиланзар, бокъон боарам, нийсхон хаттараш, закон массаза а хиннад  керттера моттиг дӏалоацаш. Дезалера  хьал, нийсхон тӏехьа латта дешаш  дувцар  цун безам тӏаозаш хиннар дар. Бокъо хӏара денна дӏахьоча вахаре эшаш дола цхьа дакъа да, цо тӏахьех   наха новкъостал дара, цар бакъдар хьаллацара. Къаьстта цо дӏайолл кӏоаргга лард, цу тӏа тахан толамаш доахаш ва Мухьмад. Юкъарча вахаре ӏаткъаш хила йиш йолаш хиларах дукхагӏа езаелар цун из професси.

«Москверча паччахьалкхен М.В. Ломоносова цӏерагӏча  университета уголовни гӏулакха даькъ тӏара дешар  деша лаьрхӏа ва со.

Сона хоза хеташ гӏулакх да криминалистика, тохкама болх. Дӏахо со лаьрхӏа ва Гӏалгӏайче юхава а, тохкама даькъе болх бе а», - аьлар зӏамигача сага.

Олимпиадага кийчо еш Мухьмада аьлар, цу толамашта тӏехьа латт гуманитарни ӏилма меттел, иштта боарама-бокъоний йоазош ӏомадара къахьегам, суда болх а исторен бокъо а йовзар.

Тахан Мухьмад ва Гӏалгӏайче дӏайовзийтача хьаькъала боарам бустача яхьашка, ший хургдар къаьгга гуш вола саг санна. Цо яхачох юрист- из диплома тӏа дӏаязбаь болх хинна ӏац, из лакхара бехктокхам бола  боарам дӏабехаш дола гӏулакх да. Дезалера  ӏадат дӏадахьар, лакхача боарама говзанча хилар - из да Мухьмада керттера низ луш дола хьал, цо новкъостал ду хьалхашка латта чоалхане декхараш кхоачашде.

Ерригроссийски дешархой олимпиадан финалага кхачаро  Мухьмада тешам лу,   нийса никъ хержа хилара. Иштта, ше хержача наькъо, ӏадаташ лоархӏаш хиларо цхьана  хьакхолл  хургдола российски бокъонаш лораерий керда ноахал.