Дукха ха йоацаш, ГӏалгӀайчен культуран даькъ тӀа дӏабайра эггара сийрдагӀа болча седкъех цаӀ – ший 71 шу долаш ӏел дунен чу дӀаяхар Малсаганаькъан Ева. Цунна карагӀдаьлар ГӏалгӀайчен халкъа хьалхара профессиональни композитор хила, из яр гӀалгӀай композиторски ишкол хьакхеллар. Цу эздийча кхалсага ший къаманна 150 совгӀа йиш кхеллар.

Тархана Ева яьяр 1955 шера кӀимарса бетта 24-ча дийнахьа. Цун бера ха, из кхувш йоагӀаш хинна ха дӀаяхар дукха дийша болча наха юкъе, цу хана Нохч-ГӏалгӀай мохк оалача моттиге. Къаьстта укхаза езаелар цунна ашараш, уж дӀахо цун вахаре йисар из ше мел яхача хана. Ашарашца болх бар цунна дезаделар даь-нана Налганаькъан Амнат (пандарча), иштта ший нана Къуркъанаькъан Елена бахьан долаш, из яр пианино лакха ховш.

Кхыметтел ах бӀаь шу даьнначул тӀехьагӀа а, Малсаганаькъан Евай болх цӀи йоаккхаш хул боккхагӀа болча наха а кагирхошта а юкъе.

НГӏАССР культуран Министерстве, иштта Нохч-ГӏалгӀай паччахьалкхен филармоне болх баро цунна таро елар кхоллама нахаца бувзам лелабе, тӀехьагӀа профессионал хинна ший моттиг хьалаьца дӀаяха.

«Безам Даьлагара ба, хӀаьта со из юкъарлонга дӀакхачийта безаш я», - аьлар цо, цкъа ше интервью луш.

Наха дезалуш хиннар дар цун дег чура цӀена хилар, хоза оаз, шийна гонахьарча наьха самукъадаккха хар.

Из яр ГӏалгӀай Республикан цӀихеза искусствай болхло, цунна деннадар ГӀР эггара дезагӏа дола совгӀат - «Карагӏдаьннарех» яха орден, из яр Российски композиторий союза доакъашхо.

Вайна дагайоагӀаш хургья Малсаганаькъан Ева сийрда, догцӀена, ший Даьхе езаш, начӀал дола саг санна.

Везача Дала гешт долда цунна, къахетам болба цох.