«Кагирхойи бераши» яхача къаман проектага гӏолла боаржабеча балхаца, тӏема операце ветеранаша, бӏухоша берашта дувцаргда шоай вахарерча тӏема моттигех, Даьхенцара лерхӏам лорабара наькъех. СВО ветеранашта терко еш, юкъарча балха юкъе уж чуозаш кхетаченаш хургья царех.

«Даьхен лорабой» яхача Паччахьалкхен ганза кулгалхо, РФ герзашцарча низий Министерствон статс-секретарь – министра гӏонча йолча Цивилева Аннас белгалдир из проект укх кхаь шера ветеранаш, кагирхой кхотабеш бола болх дӏахьош йолга. «Даьхен гӏулакхе латт со» яхача боламга гӏолла шоаш тахан дӏахьоча декхарех, шоай вахаре эггара керттердарех, Даьхен хӏама лорадара тӏехьа массахана кийча хила безилгах дувц тахан ветеранаша, салташа. Россе студенташца, дешархошца цхьан истола гонахьа ӏохайша къамаьл де, цар кхетама дуккхадараш гучадаха аьттув боалл цу боламга гӏолла», - дийцар Цивилева Аннас, ший къамаьла юкъе.

Укх шера къаьстта йоккха терко еш ба цу болама вай мехка. Болама эггара хьалхара спикер хилар СВО ветеран, «Кхетам» яхача Российски оагӏон лектор волча Шоанахой Муслимах. Ший мохк, ше ваь моттиг езарах, тӏема аренашкарча доттагӏалах, декхараш кхоачашдара тӏехьа чӏоагӏа фийла хила безарах, дийцар цо къонабарашта. Кагирхой гӏулакхех йолча министерствога гӏолла, Даьхе бокъонца лорае ловш волча сага, цхьаккха декхараш хала доацилгах дувцар цо. Сага вахаре эггара лоархӏаме долча хӏамаех да ший хӏама боча, йоакхо еш леладар, боаггӏача боараме лорадар.

«Цу проектага гӏолла къонабарашта тӏема аренашка хьайца нийсденна мел хиннача хӏамах дувца йиш я, дукха хаттараш хул цар, уж дерригаш дашха а аьттув ба. Хьай ханара болаш санна хьаотт хьа царцара къамаьл. Къонабарашта ха дезараш дукха да. Даьхе езар, сий лорадар, яхь йолаш хилар фуд ха деза царна, цу дерригане мах боаггӏача боараме бовза беза царна тахан. Цу къонабарий кхоане сийрда, машаре, беркате хилийта гӏерташ къахьийгад оаха; эздий, денал дола нах хинна ураотта гӏо де деза вай царна тахан», - дийцар Шоанахой Муслима.

Дешара моттигашка дӏаухаш, йоаржаеш кхетаченаш я уж. Къаьстта йоккха моттиг дӏалоацаш да вай мехкахоша тӏема аренашка гойташ дола турпалал. Турпал волаш малхавалац саг, из хьагойта деза хьал эттача, цига гучадоалл деррига. Хӏаьта вай къаман къонгаш-м, тхьоврача хана денз, майрал, денал, яхь йолш хиларца цӏихеза  хиннаб, тахан дӏахохьош да из шоай даьшкара хьаийца гӏулакх. Йоккха терко еш хургья тӏема сийлен Денна, Тӏема форда Флота Денна, Сигаларча десантни эскара Денна,  Россе Тӏема-фецарча низа Денна хетаяь йола кхетаченаш. Боккхача мехка массайолча республикашка дӏахьоргба цу оагӏонцара болх. Из йоккха проект чакхйоалаш, «Цхьана котдаргда!» яха цхьанкхетар дӏахьоргда Москве, ахкан тӏеххьарча бетта.

«Даьхен гӏулакхе латт со» яха Ерригача Россе моттигаша дакъа лоацаш бола болам лоархӏаме бола болх дӏахьош ба. Эггара хьалха тӏема операце доакъашхой никъ мел атта боацарех ба белгалдеш дола гӏулакх да из. Тахан Даьхе лорае арабаьнна, тӏема аренашка лелараша токхаш латтараш малагӏа декхараш да ховш хила еза къона тӏехье. Ишколашка, колледжашка, кагирхой лагерашка, вузашка цу оагӏонцара кхетаченаш дӏахьош хургба тӏема операце ветеранаш, бӏухой. Из болх хьаоттабарал совгӏа, деррига боаггӏача боараме дӏагӏоргдолаш тӏахьожам бе безаш ба «Даьхен лораабой» яхача ганза болхлой», - дийцар тхога ганза вай мехкарча филиала кулгалхо волча Оздой Муслима.

Кагирхошта юкъера Даьхенцара безам чӏоагӏбеш хургья уж кхетаченаш. Къонача тӏехьенна нийса никъ хьехар, шоай Даьхенца лерхӏам хилар эггара доккхагӏча гӏулакхех долга хьалхадахар тахан боккхагӏбарий лоархӏаме декхар да, аргдар аз. Тӏема аренашка цӏенах, мехках, дезалах хьегаш лел; вай деналах бизза бола къонгаш. Цар дукха да тахан къонабарашка дувца, довзийта.