Къам арадаьккха 82 шу дизарга
ГӏалгӀай 1944 шера мехкахбахар дагалаьцар
Наьсарен Мемориале тахан нах гулбелар, 1944 шера вай къам мехкахдаьккха 82 шу дузаш хилар дагалаца. Дагадехар вай даьша-ноаноша цу халонашта духьалъэтта лайна Ӏазап.
Цига вӏашагӏкхийттарашта юкъе бар балан ди белгалдеш бола къоаной, политикаш, юкъарлон викалаш, дина хьалхалаттараш, мугӏарера бахархой. Ше къамаьл деш, ГӏалгӀай Республикан кулгалхочо Келаматанаькъан Махьмуд-Ӏаьлас белгалдир; саькура бетта 23-ча дийнахьа гӀалгӀай къаман вахар декъаделар шин даькъа, аьнна. Из яр дӀаяхари хургйолеи ханаш, цул тӀехьагӀа 82 шу дӀадаьлар. Цу хана вай къамо лайна халонаш йийца варгвоацаш хала хиннай.
Тахан са ала безам ба, вайна цӀаккха а бицлургбац цу дӀаьхача 13 шера мехкахдаьнна лелаш, цу хийрача мехка вай дӀабехка гаргара нах. Бакъда уж халонаш дагаухаш вай цунца цхьана тахан доаккхал ду, цу къизалах вай даьй-ноаной ца бохаш чакхбаьнна хиларах. Уж дийна биса а Ӏац, цар лорабир вай мотт, вай дин, Ӏадаташ, денал. Къаьстта уж духьалъотталуш хиларо юха мехкадаьхар вай. Мехка Президента даим белгалду; Россе низ къамий дукхалца, цун исторически бакъдолчунца ба, яхаш. Паччахьалкхен политика лаьрхӀа я цу тайпара хьал кхы нийслургдоацаш, иштта хӀара къам вай боккхача мехка Россена чудоагӀаш паргӀата хилийта, шоай бокъонаш лораеш хилар дага а лоаттадеш», - аьлар Макшарипа Махьмуд-Ӏаьлас.
ГӏалгӀай Республикан къоаной Кхела кулгалхочо Даскенаькъан Мурада теркам тӀабахийтар таханарча белгалонна.
«Саькура бетта 23-гӀа ди берригача мехка Даьхен лорабой Ди да. ГӏалгӀай массахана хиннаб турпалхошта юкъе, иштта хург а ба. ГӏалгӀай къаманна из ди баьде дера. Уж шераш дагаухаш, вай къоаноша гӀалгӀай къаман хьехар де деза керттердар, - цхьоагӀо хилар, боккхагӏбараш лархӀар хьалхадоахаш. Воай гӏалашта эзараш километраш гаьна долаш, вай дайнадац. Вай юхадаьхкар мехка. Цо тешал ду, ший овла дагабоагӀаш дола къам дов йиш йолаш цахилара»,- аьлар Османа Мурада.
Шолжа-Шахьара исламски института ректора Мухлой Жабраила бахархой тӀахьийхар шоай дӀабахача даьшца бувзабенна дагалоаттам лелабара, уж ба вай дин, вай мотт, вай вахар лорадаьраш.
Къаьстта гулбеннараша теркам тӀабахийтар «Назма» яхача тоабанна. Кхоллама тоабо уйлангахьа бигар ладувгӏаш хиннараш, шийлача Казахстане къам ӏодига хинна ханаш дагайохийташ.
Кхетаче чакхъяьлар, цига бейнача наха тӀера дуӀа деш.
