Эггара эшача хана, уллув хилар
СВО кхаь бӏухочун гӏулакхага хьежар вай мехка
«Даьхен лорабой» яхача ганзо, массахана новкъостал деш, оагӏув хьаллоацаш бувзам лоаттабу тӏема операце доакъашхошца, ветеранашца. Хӏаьта къаьстта йоккха терко лоаттае езарех ба тӏема аренашка лозабаь цӏабаьхка заӏапхой бола ветеранаш.
Укх деношка вай республике хьакхаьчар ишттача хьале болча ветеранашта шоай цӏагӏа цхьацца гӏулакхаш де гӏо деш бола «Хьаькъале цӏа» яха гӏирс. Тӏема операци дӏахьоча моттигашка геттара чӏоагӏа лозаваь волча кхаь бӏухочун цӏагӏа оттаеш я уж хӏамаш. Тӏема декхараш кхоачашдеш латташ, ийккхача минах ког боацаш висар бӏухо Къоастой Руслан. Иштта тӏема аренашка чӏоагӏа лозабаь болаш цӏабаьхкаб ветеранаш Бохтаранаькъан Мухьмад, Гаьгенаькъан ӏамархан.
Дегӏа маьженаш тахан дикка болх беш яц цар. Дегӏа хьал меттадоаладе хьожаш, дуккхача бетташка дарба деш хиннаб уж, тахан а лорашкара гӏо эшаш ба. Мехка кулгалхоша гӏо деш, кастта цар цӏеношка вахара хьал аттачахьа доаккхаш дола гӏирсаш оттадергда. Заӏапхой болча тӏема ветеранашта эшар, дезар фуд техка, кухне лоаттаю хӏамаш, «Хьаькъале цӏа» яха гӏирсаш, компьютер, робот-пылесос, тайп-тайпара датчикаш, хьаькъал дола колонка, розеткаш, моллагӏа хӏама ийшача хоам бе йиш йола «залтингаш», иштта кхыдараш а ӏалашдаьд тахан.
«Цӏагӏара хьал аттачахьа доаккхаш, сайна гӏо дарах доккха баркал ала лов сона! «Даьхен лорабой» яхача ганза доакъашхой сагӏа хилда иштта терко еш хиларах», - аьлар ветеран волча Къоастой Руслана. Тӏема операце ветерана чуденнача дехара ларах тохкам беш, деррига теркалдеш, ха йоаккх ганза болхлоша. Эггара чӏоагӏагӏа заӏапхочунна эшар фуд хар да лоархӏаме. Царна гӏо лоаттадеча программан юкъе 86 тайпара хӏамаш я тахан. Цу юкъе да «Хьаькъале цӏа» яха гӏирсаш, болх бе къоастаяь моттиг, заӏапхочун хьалага хьежжа тоаяь кухни, иштта тоаяьй ниӏ, хьаелла, дӏакъовла заӏапхочунна атта хургдолаш, пандусаш, кхыдараш.
«Цу оагӏонцарча хӏара проектага дикка хьожаш ха йоаккх оаха. Заӏапхой болча ветеранашта шоай цӏагӏа гӏолла лела, цӏагӏара гӏулакхаш кхоачашде, арабовла, моллагӏа хӏама ийшача хоам бе аттагӏа хургдолаш вӏашагӏъелла я программа, деррига чулоацаш. Тхона чӏоагӏа лоархӏаме да заӏапхо ше уж гӏулакхаш кхоачашде аьттув болаш хилар, из да-кх керттердар цу балхаца. Тахан царна халадар ма хулла аттача даккха хьажар эггара чӏоагӏагӏа терко е езарех да», - дийцар тхога интервью луш «Даьхен лорабой» яхача ганза моттигерча филиала кулгал деча Оздой Муслима.
