Моттигерча журналисташца хиннача пресс-конференце режиссёр волча Угурчанаькъан Адама белгалдир, из кино вай овла бовзийташ долга.

«Кхувш латтача къонабарашта шоай истори книжкашка гӏолла доацаш, Къилбаседа Кавказа лоамий оаламашка, бокъонца гуш долча хӏамашка гӏолла довза деза», - аьлар Адама.

Кино оттадаьд, исторега диллача, бокъонца хинна хӏамаш керте увттадеш. Дзурдзукий лаьтташка татрий-маалой цӏоз чугӏертача хана хинна хӏамаш да кинос гойтараш. Бӏарччача къаман вахар да вайна цига гур.

Ураотташ латтача къонача тӏехьено масал эца дезараш дукха да цу юкъе. Тхьоврача хана денз, вай даьша лакха лоархӏаш хинна гӏулакхаш, оамалаш йовзийташ болх ба из. Шоай даьй никъ сенах латташ, мишта хиннаб хар лоархӏаме да къонабарашта. Бера хана денз фу хьалхадоахаш, малагӏа хӏамаш ӏомадеш хиннаб дзурдзукаш, ховргда царна цу кинога гӏолла.

«Хӏаравар ший моттиг лораеш волаш; сий, яхь, денал яха хӏамаш лархӏарца къизала, харцон духьаллатташ; из доаржадерашца къувсаш, хьабаьхкаб майралца цӏихеза хинна вай даьй. Эггара халагӏа йола моттигаш латтача хана а, шоаш хьадахьа беркате гӏулакхаш ӏо ца доахкаш, хьабаьхкаб вай даьй», - дийцар кино доаккхаш хиннараша.

Режиссёра теркалдечох, къаман бокъонца бола низ герзах латташ бац, боаггӏача боараме, яхьаца ший Даьхе лорае харах латташ ба. Угурчанаькъан Адам ткъо совгӏа йолча туркий исторически проекташка, иштта диъ голливудски киношка дакъа лаьца саг ва. Лакха говзал, начӏал дола нах шийна гонахьа гулбе аьттув баьлар цун, исторически кино тӏехдика хургдолаш.

Кино арадаьннад, хӏанз хьажархоша шоай оагӏув хьаллацар мишта хургда хьожаш я цу тӏехьа къахьийга тоаба. Хӏаьта цхьа хӏама да тешшаме бакъдолаш – бахархошта доккха совгӏат хиннад цох. Иштта чӏоагӏа къахьийга даьккхача кинога хьежачул тӏехьа шоай истореца, беркатеча ӏадаташца дувзаденнараш геттара чӏоагӏа лораде хьожаргба, аьнна, хет къонабараш.

Вай даьй вахаре дукха хиннад доаккхал де мегаргдараш, хӏаьта тахан кхувш латтарий декхар да, халача ханашка а тӏехьа цар мел ца долийташ лорадаьраш дӏаходахьар, боаггӏаш бола лерхӏам бар, ма дарра аьлча, деналца, майралца цӏихеза хиннача даьй никъ бовзар.