Гӏалгӏай Республикан Арбитражни судо, уж кантракташ оттаяр нийса дац, аьнна, лаьрхӏар; законо дӏадехача беса уж цахилар бахьан долаш.

Шолжерча ӏаьдало, шахьара доазонаш тоадарца дувзаденна балхаш дӏадахьар тӏаийцар. Из гӏулакх къаьга а дика а хургдолаш аукцион е яхь дӏаяхьара меттел, администраце болхлой цхьан оагӏонца из контракт чӏоагӏйир. Балха юкъе цу тайпара кхоачамбоацараш нийсдала йиш йолаш дац. «Контракта балха даькъ тӏа товараш эцарах; паччахьалкхен, доал деча даькъ тӏа эшар лоаттадарах» дола Федеральни закон толхадеш да из.

Цу кхаь контракта чудоагӏаш да, Бохтаранаькъан урам, иштта цун гонахьара доазув тоадар. Хьалхара контракт я 6,9 млн сома маьха; шоллагӏъяр – цу урам тӏа 5 млн сом мах бола наькъа такилг ӏодиллар; иштта кхоалагӏа, эггара йоккхагӏъяр, гӏандаш, нувхашта яьшкаш оттаяр, сердал хилийтар, наькъа такилгаш тоадар, цхьацца дола доазонаш баьццардерзадар, цу юкъе Бохтарнаькъан, Люксембург Розай урамаш долаш, уж балхаш а 4 млн сом совгӏа дӏадодаш да.

Шолжа шахьара администраце шийна могар дир из болх законо дӏадеххача беса баь хилар бакъде гӏерташ. Амма судо из иштта доацилга хьагойтар. Цо белгалдир, цу юкъе кхоачамбоацараш хилар; цӏаьхха, чоалхане хьал этта моттиг ца хилча, цу тайпара эцараш де законо бокъо ца лулга.

Из да, болх чакхбаьннабале а, из хьабаьрий бокъо яц хьаийца ахча шоашта дита, хӏана аьлча законо дӏадехача беса дӏабихьа болх бац из. Цу контрактах хьа мел ийца ахча доал деча даькъ тӏарча бюджете юха чудала дезаш да. Цу тайпара, ше дӏадахача юхадоагӏа 17 миллион сом. Из доацаш а, бехке йолча оагӏоно паччахьалкхен гӏод текхад федеральни бюджета болча пайданна.

Цу тайпара, шахьара мэре таро хиланзар тӏаьргаш дӏацаяхьара бахьан суда довзийта. Судо дӏалаьрхӏар, цу тайпара администраце дӏабихьача болха юкъе закон толхадеш моттиг хилар.

Антимонопольни болхлоша яхачох, уж судо оттадаь каьхаташ ерригача республиканна а боккха лоархӏам болаш да. Цу къаьггача масало хьагойт, цу тайпара эцар дара гӏулакх антимонопольни балхо, судо дӏахо а юхатохаш хургдолга. Ца доагӏаш даьккха ахча доал деча даькъа бюджете юхадалар – из паччахьалкхен, бахархой хьашташ лорадара, иштта бюджетера ахча лора а деш, мишта дӏадода ховш леладара йола кӏийле я.