«Кхетаче дакъа лоацаш бар Гӏалгӏай Республике гӏолла йолча Россе ФСБ Доазон урхаллен кулгалхо Синицын В., иштта Гӏалгӏай Республике гӏолла йолча Российски Федераце тохкама урхаллен кулгалхо Асхабов А., Россе ФСБ Доазон урхаллен болхлой, МВД, Тохкама комитета, ФСИНа, суда пирстопий Федеральни гӏулакха викалаш, иштта балха ветеранаш», - аьлар «Сердало» газетага мехка Кулгалхочун, Паччахьалкхен зарбан болх лелабераша.

Таханарча хьалашка доазув лорадеш болча наьха болх дӏадехаш ба денал, лакха сакхетам, майрал, ше Даьхенна денна дош лорадара тешаме волаш хилар. Гӏалгӏайчен, Россе къулбехьен доазонашкара географе хьал белгалдеш да еррига паччахьалкхе лораяра геттара лоархӏаме хилар.

Лоаман довкъаш тӏа, чоалханеча моттигашка уллаш дола Даьхен доазув лорадар геттара хала болх ба; бакъда иштта дале а, доазув лорадеш латтарий моттигерча ӏаьдалца, бахархошца цхьана бувзам лелабеш хиларо моллагӏча кхерама духьалъоттара йола таронаш хьакхолл.

Келматанаькъан Махьмуд-ӏаьлас белгалдир, болх лерттӏа вӏашагӏбелла ца хилча, тешшаме бокъонаш лораерий балха хьал а хьакхолла йиш яц республикан чухьнахьа. Кхерамзле цхьана вӏашагӏйоаллаш йола оагӏув я, цига лоархӏаме да моллагӏча боахаме из болх беш бале а, хӏара болхлочо шийгара юкъедахьа дакъа.

Тахан латтача хьалашка, бокъонаш лораераш геттара чӏоагӏа цхьоагӏо йолаш хила беза. Гӏалгӏайчен сатем, кхерамзле тийша я цар дӏахьоча балхах. Зулам юхатохара, чоалхане гӏулакхаш къоастадара, урамашкара бокъонаш лораяра ӏалашо яр, судо яхар кхоачашдар - из деррига цхьана вӏашагӏдоаллаш хила деза. Нагахьа санна царех цхьа дакъа мелдолийташ хилча, деррига гӏулакх дохаргда. Из бувзам вӏашагӏбоаллаш хилар белгалдир республикан кулгалхочо, тайп-тайпарча низа оагӏоний викалаш Сийлен Зале вӏашагӏтеха хиларах.

Цу дийнахьа деннача хӏара совгӏата тӏехьа латт боккха къахьегам, сага лоӏам, лоархӏаме декхараш кхоачашде, бийсаш йоаеш къахьега раьза болаш хилар.

МВД, СК ФСИН, ФССП болхлошта белгалбалара совгӏаташ даларо хьагойтар республике политикан керттера декхар - Даьхе лораяр. Гӏалгӏайче боахамаша шоайла дагадоалаш болх дӏахьош хиларо юкъарлон кхерамзле лораяра болх лакхача боарам тӏа дӏабахьа таро лу.

Лакха совгӏаташ даларо хьагойт, ала хӏама доацаш, цар шоай болх тӏехдика кхоачашбеш хилар.

Цӏай дӏахьош хиларо кхы а чӏоагӏагӏа бехктокхаме оттабу эпсараш, шоай лоархӏаме гӏулакх лакхача боарам тӏа лоаттаде.

Республикан Кулгалхочо баркал аьлар доазув лорадеш латтача ветеранашта, къаьстта цар масало эпсарий керда тӏехье кхее таро луш хилар белгал а деш. Боккхагӏа болча эпсарий ноахалаша вай тӏехьен юташ йола тамашийна хьаькъале лар тахан накъайоалаш хьайоагӏа къонача говзанчашта, цо таро лу тӏема духьалъотта кийча хилара лакха боарам лелабе, иштта вай Даьхен доазонаш лорадеш латтарий мугӏарашка шоай хьамсарча мехкацара безам совбаккха.

Кхетаче чакхйоалаш, Келаматанаькъан Махьмуд-ӏаьлас баркал аьлар доазонаш лорадеш латтарашта, цар шоай гӏулакх иштта дика дӏахьош хиларах, дӏахо а Даьхенна гӏулакх иштта дӏадахьа цар аьттув хилар лайра цунна.

ӏаьдала болхлой гӏирс лелабу денал дола маӏанах бахьан долаш, Гӏалгӏайчен машаре вахар тешшаме лорадеш да.