«Вай декхар да юкъарлон тӏахьожам лоаттабара болх; пайда а эцаш, дика тоабеш; дӏабахьа. Хӏара ОНК доакъашхочун тӏехьа латт сага бокъонаш лораяр, цар нахаца хила безача беса хилар. Со тешаш ва, тахан вай ӏомадаьр бокъонаш лораяра тӏехьа дахаш хургда», - аьлар керттерча Гӏалгӏайчен бокъонаш лораяра викала ше семинар хьаеллаш.

Семинар дӏахьош хилара бахьан дар профессиональни балха говзал лакхъяр, лаьца боахкача наьха цу моттигера хьалаш миштад хьожаш болх лелабар.

Дикал йола тӏахьожам цига лоаттабар лоархӏаме да, наьха бокъонаш лораяра, кхоачамбоацараш юкъецадалийтара.

ӏомавара программа кийчъяьяраш, балха тӏа чакхъяьккхараш а ба Москверча О. Е. Кутафина цӏерагӏча паччахьалкхен юридически университета сага бокъонех йолча ӏилман дешара центра хьалхале лелаю кхелахой. Семинар дӏахьош хиннараша хоадам болаш къоастайир ОНК керттера бокъонаш, нах лаьца боахкача моттигашка тӏахьожам лоаттабар, бокъонаш лораеча ӏаьдалца, администрацеца, урхалленашца айхха бувзам лелабар; иштта халкъашта юкъера, российски боарамах латта лаьцача боахкача наьха бокъонаш лораяр. Дешаро таро елар Гӏалгӏайчен тӏахьожама кхело Юкъарлон доакъашхошта ха дезаш дар цигара хьаэца, федеральни кхелахошца балха говзал екъа. Цу тайпара, сага бокъонех волча викала института, мехка хьалхале лелаеча ӏилман центро шоайла бувазм лоаттабеш болх дӏахьош хиларо таро лу республикан сага бокъо лораяра болх чӏоагӏбе, тоабе.

«Сага бокъонех волча ӏилман-дешара центра кулгалхочо, юридически ӏилмай доктора, профессора Дудко Игора довзийтар юкъарлон тӏахьожама кхела балха керттердараш», - аьлар «Сердало» газетага ГӏР УПЧ хоамий-аналитически даькъ тӏа. – Административни бокъон, гӏулакха кафедра доцента, юридически ӏилмай кандидата Сабаева Светланас йовзийтар чурча гӏулакхий нах лаьца боахкача моттигашка ОНК балха оагӏув. Криминологе, уголовни-кхоачашдара бокъон кафедра доцента, юридически ӏилмай кандидата дийцар, уголовно - кхоачашдара балха юкъарлон тӏахьожам лоаттабарах лаьца.

Семинара болх шаьрбара оагӏонна чудоагӏаш дар, лектораша кулгал а деш, балха оагӏонаш къоастаяр; цига доакъашхоша техкар, нах лаьца боахкача моттигашка тӏахьожама болх дӏахьош, шоашта хьалхашка нийслу кхоачамбоацараш. Программа дӏахьош, уж бахар Гӏалгӏай Республикан Шолжа-Шахьарерча Россе ОФСИН №1 йолча тоавалара центре, цига доакъашхошта дайзар лаьца боахкача наха хьакхелла цигара хьалаш».

Кхетачен чаккхе еш, Цӏечой Ибрахӏима Москверча О.Е. Кутафина цӏерагӏча юридически университета ӏилма-дешара центра кулгалхошта дег тӏара баркал аьлар. Цо иштта баркал аьлар из болх дика вӏашагӏбелларашта, мехка хьалхале лелаеча бокъоний викалашкара балха говзал хьаэца дика таро хиларах.

«ОНК Института керттера теркам бу паччахьалкхенна, иштта лаьца боахкача наха юкъе бувзам хилара, - белгалдир Гӏалгӏайчен сага бокъонех волча викала. – Къаьстта юкъарлон тӏахьожам хиларо таро лу из болх къаьгга дӏабахьа, нах болча моттигашка цар бокъо лорае».

Юкъарлон тӏахьожама кхела кулгалхочо Мартазанаькъан Тимура, иштта мехка ОНК доакъашхоша шоаш «Сердало» газета интервью луш белгалдир, мехка йоккхагӏа йолча юридически вузаца бувзам лелабар из Гӏалгӏайчен бокъонаш лораяра юкъарло дегӏаяра лоархӏаме гӏа ба, цо хьакхолл республике ОНК балха эша чӏоагӏа кӏийле.

Пайда эцаш а цига дакъа лоацаш а хилар мехка Юкъарлон палата кулгалхо ӏамарханаькъан Лейла, прокуратура, МВД иштта Гӏалгӏай Республике гӏолла йолча Россе ОФСИН викалаш, сага бокъонех волча викала аппарата болхлой.