Мехка таьрахьашцара «турс»
Хоамашцарча кхерамзленах дувцаш, кхетаче дIайихьар Магасе
Кхерамзлен оагIонца дувзаденнарех дувцаш, кхетаче дIахьош хилар Магасе. Цунна кулгал деш хиннар вар премьер-министр вола Сластенин Владимир. ЛоархIаме, доккхий декхараш чулоацаш йолча пхе темах дийцар цига. Царна юкъе дар паччахьалкхен оагIонцарча таьрахьашца дувзаденнараш лорадар, иштта кхыйолча моттигашкара технически гIулакхашцара кхерамзле лораяр.
«Хоамашцарча кхерамзленца дувзаденнараш дикка сатем боабеш долгах дийцар кхетаче Къулбехьерча, Къилбаседа Кавказерча федеральни моттигий Россе ФСТЭК оагIон кулгалхочун гIонча йолча Шеверова Надеждас. Цо белгалдаьчох, 2020-ча шера денз, Россе моттигашка из хьал телха да. Цунца дувзаденнараш лораде дезаш хиларах, кхайкарал деш бола болх дIахьош ба ГIалгIай мехка а.
Технически оагIонцара хIама лорадар дувцаш ба паччахьалкхен, КИИ моттигашка. Духхьал укх шера Iаьдала моттигашка 80 каьхат дахьийтад, иштта 80 совгIа – КИИ моттигашка», - йоах «Сердалога» мехкарча Паччахьалкхера бенача хоамо.
Тахан вай мехка цу оагIонцара хьал мишта латт дийцар кхетаче моттигерча Россе ФСБ оагIон кулгалхочун гIонча волча Мирошник Дениса. Дикача оагIорахьа хинна массехк хувцам белгалбеш, доклад йир цо.
Республике кердадоаккхаш латт софта (компьютерий Iалашон) хIама, автономни программни болх ба дIахьош, иштта моттигий хIама къоастадеш къахьегаш ба. Дале а паччахьалкхен, лоархIамеча моттигий таьрахьашцарча кIийлен хIама дикка терко еш лораде дезарех да. Таьрахьашца дувзаденнараш юкъелоацаш, болх дIахьош йолча моттигашта терко еш, балхага хьожаш ба мехка.
Къаьстта терко еш дийцар цу кхетаче федеральни бокъоно дIадеххача тайпара, цу оагIонца дувзаденнараш лорадарах. Карарча хана мехка ерригача ИТ - моттигашка ревизи дIайихьай, хIаьта цу гIулакха бехктокхаме бола болхлой фу хов тохкаш, шоай говзал лакхъеш ба.
Иштта кхетаче дийцар нах гуллуча моттигашка из болх мишта латт. Республикерча «Магас» аэропорте бокъоно дIадеххача тайпара юкъебаьккхаб из болх карарча хана. Наьсарерча, МагIалбикерча, Шолжа-Шахьарерча автовокзалашка дIадоладеш мара дац из гIулакх. Цу моттигашка ИТ оагIонцара хIама лорадара тIехьа къахьегаргдола тоаба вIашагIйоллаш ба тахан республике.
Керда гIирсаш Iоувттадеш, из болх тоабар эггара хьалхарча, лоархIамеча гIулакхех да. Кхетачен болх чакхбоалаш, паччахьалкхен кулгалхо волча Сластенин Владимира белгалдир, хоамашцара, таьрахьашца дувзаденнарашцара кхерамзлен хьал боаггIача боараме лорадеш, массахана лакха терко еш хилар, духхьал цхьан ИТ - моттигий декхар хинна ца Iелга.
Массайолча Iаьдала моттигаша вIаший бувзам болаш, цхьана къахьегаш кхоачашде деза лоархIаме декхар да из. Премьер-министра теркалдир, цу гIулакхацара хIама боккха тIахьожам эшаш долга. Таьрахьашца дувзаденнарий оагIонцара «турс» тешам болаш, чIоагIа хила деза.
Сластенин Владимира теркалдечох, киберкхерама духьале яр, бахархой доалахьара хIама лорадар, вахара- политически оагIонцара гIулакхаш лертIа лоаттадар, къаман кхерамзлен болх чIоагIбар, ерригача республикан хIама лорадар долга. Цу оагIонца кхоачашде дезараш, хIара моттига декхараш белгалдир кхетаче. Лакха терко еш хургба мехка цу балха.
