Диъ шу даьлча денз, йиӏиг йолалу исбахьален искусствоца бувзам лелабе. Цкъа хьалхагӏа из дешаш хул Малхбоален-Казахстана паччахьалкхен М. О. Ауэзова цӏерагӏча университете, архитектора Iилма ӏомадеш. 2016 шера цо йоаккх Москвера К. Райкина сценически искусствон Лакхара ишкол, суртанча-сценограф яха гIулакх карадерзадеш.

Шергара шу массаза доал, ший профессиональни говзал лакхъеш, Тамара ше лаьрхӏачунга кхоач. Тахан из я начӏал дола суртанча-сценограф, архитектор-проектировщик, Россе театра болхлой Союза доакъашхо.

Тӏехьа дисад кхыча мехка даьккха 30 шу. Иштта дале а, цун дас-нанас из хьалкхею ший къаман ӏадаташ, эхь, эздел довзийташ; уж дика лорадеш хургйолаш.

Къам дезаш, ӏаламцара безам совбоалаш хилар хьагойташ ба Мухьмада Тамарай болх. Из го йиш я культуран дегӏаахара центра лаьрххӏача гойтаме. Укх деношка цига баха таро йолаш ба суртанчий гаргара нах санна, цу хозалга хьажа безам мел бараш а.

Къаман кеп гойташ болча тӏабувхабеча гӏирсо, кӏувсаша, басарашца даьхкача сурташа хьагойт шин къаман вӏашагӏъэр - гӏалгӏайи казахийи.

Цига баьхкача наха дукха ха йоаккх, цу хозалга хьежаш. Из болх хьакхеллаб 2006-2026 шерашка, цо хьагойт вахара бакъдар. Укхаза дуккхачар шоай уйла тӏайохийт, саг ираз долаш хилара дукха хӏама ца эшаш хилар довзара, иштта хинна дӏаоттара малагӏа дакъа юкъедахьаш хила веза а хоалуш да.

«Сона чӏоагӏа хоза хийтар «Дӏаяхача ханашка хиннар» яха сурт. Автора таро лу ший балхага гӏолла дукха хӏама го, довза. Цхьабараш материальни таронашта тӏехьабаьнна, бокъонца дола мах бараш дицденна ба, вожаш нахах сов чӏоагӏа тешаш хиларах тийшаболх хинна а ба», - аьлар шийна хетар дувцаш Галай Адама.

Массанена деннадац искусствос дунен тӏа наькъахо хила. Бакъда вайх хӏаранена гуш я гонахьара хозале, хозача ӏаламах сатем бе а, ший уйлашта мутӏахьа хила а хов. Вахаре цатоамаш шортта да, бакъда гонахьардар нийса тӏаэцаш хилча, моллагӏа йола халонаш тӏехьаюс.