Чернобылерча АЭС хиннача хатара юкъе дакъа лаьцараш дагалаьцар Магӏалбике
Цӏаккха а дицлургдоаца денош
Хӏанзчул 40 шу хьалха Чернобылерча АЭС хиннача хатаре дакъа лаьцараш дагалаьца, сийленг оттадир тӏема сийлен шахьар йолча Магӏалбике. Цига хинна ветеранаш, шахьара администраци, гӏо деш бараш, иштта бахархой гулбеннабар цу гӏулакха лаьрхӏача кхетаче. Из доккха хатар хинна итташ шераш дӏадаьннад, 1986-ча шера шоай уйла ца еш, цига оарцагӏбахараш дагалоацаш хилар из мемориал.
«Из сийленг - кхера хинна ӏац. Цу доккхача, унзарча хатаре оарцагӏбахарий цӏераш йиц ца еш дола хӏама да из. Тӏехьа тӏа боагӏарашта а довза дезаш истори да. Шоай къаман деналах бизза бола къонгаш Чернобыле гӏо де бахалга ха деза къонача тӏехьенна», - дийцар «Сердалога» Магӏалбикерча администраце болхлочо Бохтаранаькъан Ибрахӏима. Дагалоаттама, сийлен моттиге оттадир сийленг. Цу наха баркал оалаш хиннараш дукха бар кхетаче. Исторега гӏолла вайна хов, 1986-ча шера Чернобыле эттар мел доккха, унзара хатар дар. Дукха адам дар кӏалдиса хиннар. Массайолча моттигашкара дог лазаш бола нах гӏо де оттарах, миллионаш адам атомни станци ийккхача моттигашкара кӏалхардаьккхар.
Цига дакъа лоацаш хиннача вай мехкахошта майдилгаш, лоархӏаме грамоташ елар. Кхетаче дакъа лоацаш хиннача хьакимаша белгалдир, шоай унахцӏенон уйла ца еш, хало тӏакхаьчача наха гӏо де бахараша гойта турпалал вӏалла хам баь, мах баь варгвоацаш долга. Республике, шахьаре цар даь гӏулакх дицденнадац е дицлург а дац! Тахан дагадоха эттача чӏоагӏа унзара хьал дар Чернобыле этта хиннар. Массайолча моттигашкара адам тӏадехаш, новкъостал эшаш дар цига цу хана.
Дуккхача шерашка могаш, маьрша болаш баха даькъалабийцар хатара юкъе дакъа лаьца ветеранаш. Ишттача халача деноех шоаш чакхбаьннабале а, тахан а дуккханешта масал долаш, вахара никъ дӏахохьош ба цига хиннараш. Цхьаькха керда сийленг хилар тӏема сийлен шахьаре. Цу мемориало бахархошта, ураотташ латтача къонабарашта массахана дагалоаттадергда, бокъонца бола турпалаш уллув болга… Доккхача хатарцара бувзам гойташ йола моттиг хилар цох. Чернобыльски АЭС, цӏаьхха, болхлошта вӏалла дагадоацаш этта хиннача хатарах-м тахан а дувцаш латташ да дерригача дунен тӏа, хӏана аьлча иштта дицлургдарех дацар из къемат.
Сага нигатага, уйлашка хьежжа хул цун вахара никъ а. Бокъонца бола турпалаш тахан вайна юкъе бахаш ба, деналца, майралца моллагӏча хатара духьалъотта везилга къонабарашта хьалхадоаккхаш. Цар хам баь даргдац вай цӏаккха а! Исторе чӏоагӏъенна яха йисай турпалал гойтача цар цӏераш, царех дукха дувцаргда тӏехьа тӏайоагӏача хана а, къонача тӏехьенна масал гойташ. Кхы ма отталда из тайпара хатар! Шоай са ца кходеш къахьийгараш иразе, беркатаца, гӏозаленца бахалба дуккхача шерашка!
