Шеко а йоацаш, меттаоттавар дукха а бӀаьха а болх ба. Спортивни кхетаченаш дӀаяхьаро дика новкъостал ду царна. Из да цар кхетадеш хилар, шоаш юха а хьалха санна вахара юкъе дакъа лоацаш болга, юкъарлон цхьа дакъа шоаш долга.

ЛаьрххӀача операце бӀухошта лоархӀаме да физически кеп, лоӀам хилар. Уж шоай хана Даьхе лораеш лаьттараш ба. Царна хӀамах Ӏоткъам хургбоацаш, вахарцара чам цар бовргбоацаш лаьрххӀа къахьегаш я «Даьхен лорабой» ганз, цо ГӏалгӀай Республикан Ӏаддалхой Федерацеца, Россе машинаш яра Союза даькъаца цхьана вӀашагӀъеллар Ӏадсаькх кхоссарах йола яхь.

«Спорт - из духхьал физически лоӀам хинна Ӏац, из Украине дӀахьош йолча лаьрххӀача тӀема операце ветеранашта йола таро я керда новкъостий лаха, шоаш юкъарлон цхьа дакъа долга кхетаде. Тхо тешаш да, спортивни кхетаченаш дӀахьош хиларо царна новкъостал ду шоай дегӀ чӀоагӀде, сапаргӀатадаккха, амал даь баьнначул тӀехьагӀа керда вахара таронаш хьаелла»,- аьлар ГӏалгӀай Республике гӀолла йолча «Даьхен лорабой» ганза кулгалхочо Оздой Муслима. Спортивни яхьаш дӀахьош, цхьан майдан тӀа гулбелар, шоай дикагӀа дола шераш Даьхенна дӀаденна, денал дола нах. Цига дакъа лоацаш хилар дукха ганза чубоагӀаш бола бӀухой, цу юкъе амал даь баьннараш а заӀапхой а болаш.

ДоттагӀала оагӀоно вӀашагӀтох доакъашхой. Из кхетаче а царех яр. Тӏема гӀулакх леладераша гойтар шоашта фу карагӀдоал Ӏадсаькх кхоссача даькъ тӏа, керттердар-шоайла дог-уйла, оагӏув хьаллоацаш уж хилар.

Из болх вӀашагӀбеллараша яхачох, яхьаш дӀаяхьар лоархӀаме гӀа баккхар дар, вахаре меттаоттабеча ветеранашта лаьрхӀа, цу тайпарча моттиго хьагойт уж цхьаь боацилга, цар денал хиларах юкъарлоно доаккхал делга.

Кхетаче чакхйоалаш, шин даькъах латтача ялх ветерана (царех цхьа тоаба – заӀапхой) дипломаш, кубкаш, майдилгаш елар, цар толамаш дахарах. Из да цар деш дола гӀулакхаш тӀаэцаш, уж лоархӀаш, царех доаккхал деш хилар.