2019-ча шера Россе Президента Путин Владимира Гӏалгӏай республикан кулгал де оттавир Келаматанаькъан Махьмуд-ӏаьла. Кӏезига ха яц цу хана денз дӏаяхар. Къаман хьалха латта ше хержача дийнахьа денз, боккхача мехка Россе, ший республикан Гӏалгӏайчен декхараш, бокъонаш боаггӏача боараме лораеш, хьинаре къахьегаш, ше хьалаьцача моттиге боккха пайда боаржабе хьожаш, бахархошца бувзаме волаш, хьавоагӏа Келаматанаькъан Махьмуд-ӏаьла.

Россе Президента Путин Владимира лакха лоархӏаш ва Мехкада; федеральни оагӏонца бувзам лоаттабеш, тешаме, дика кулгалхо волаш къахьегаш ва. Хӏаьта из чӏоагӏа лоархӏаме да вай республикан хьалхашка тахан, дӏахойодача хана кхоачашде дезаш латта декхараш теркалдича.

Келаматанаькъан Махьмуд-ӏаьлас хьатӏавенача юкъа массанена дӏагойтад боаггӏача боараме болх хьаоттабе, наьха даггара хила, мехка кулгалде начӏал долаш ше волга.

Таханарча дийнахьа Мехкадас шийна гонахьарча тоабанца кхоачашдаь латтараш дукха да! Республикера экономически, вахара оагӏонцара хьал зийча, гуш да из деррига.

Доккхача толамашта, дикашта юкъе да мехка тӏалаьтта кредиташ дикка лохдар, АПК, гӏишлон оагӏонцара хӏама тоадалар, республике инвестораш тӏаозар, лорхӏаме проекташ йоаржаяр, промышленность, туризм лакхъялар, наькъий хьал меттадоаладар, иштта кхыдараш а.

СВО доакъашхошта, цар дезалашта терко яра тӏехьа боккха болх лоаттабеш; ше тӏахьожам беш ва Мехкада. Хӏара кхетаче белгалду республикан Кулгалхочо тӏема операце доакъашхой, цар цӏагӏарча наьха гӏулакхага хьажар эггара лоархӏамеча декхарех долга.

Келаматанаькъан Махьмуд-ӏаьлаца болх беш хиннараша белгалдеш да из дика саг волга; кӏаьда дог долаш, нахах дог лазаш, бахархой хьашташ ма могга кхоачашде хьажа ловш.

Вай къонача тӏехьен лаьрхӏа дукха проекташ йоаржаяйташ, кердадараш юкъекхувлаш, къахьег Мехкадас кхоана республике ӏилман, спорта, культуран, тӏема, гӏишлошъяра, кердача технологей вахаре лакха начӏал дола говзанчаш хургболаш.

Ваьча денца тахан республикан Кулгалхо даькъалавувцаш ба бахархой, мехкара хьакимаш, новкъостий, цун гонахьара болхлой, из везараш, лоархӏараш! Дуккхача шерашка могаш, маьрша волаш, аьттонца, хӏанз санна Гӏалгӏай мехка доккхий дикаш доаржадеш, ший гӏулакх дӏаходахьа даькъалавувц из цар.

Кепайоазон Цӏен «Сердало» тоаба а я, республикан Кулгалхо даькъалавувцаш. Иразах, беркатах, дикача хувцамех дизза хилда Мехкадаь вахара денош!