Унахцӏенон оагӏонцарча кхетаче дакъа лоацаш хилар вай лораш
Къилбаседа Кавказа Кхоалагӏча «Дикала бухь-2026» яхача кхетаче дакъа лоацаш хилар вай мехкара викалаш. Из хоам «Сердалога» бир унахцӏенон гӏулакхех йолча министерстве. Унахцӏенон оагӏонца дувзаденнараш тоадарах дийцар гулбеннараша.
«Вай мехкарча тоабанна кулгал деш хиннар цу оагӏонцарча министерствон хьалха латта ӏалбаканаькъан Зара яр. Цу тоабан юкъе бар мехкарча дарбанчешта кулгал дераш, лораш. Унахцӏенон оагӏонца дикка къахьегаш бола федеральни оагӏонцара говзанчаш бар кхетаче къамаьл даьраш. Цу оагӏонцарча балха тӏахьожам лоаттабеча Федеральни моттига кулгал ду Самойлова Анна яр форуме дакъа лоацаш, гулбеннарашка къамаьл деш», - йоах тхога бенача хоамо.
Боккхача говзанчаша дийцар тахан унахцӏенон оагӏонцара болх дикка тоабара тӏехьа юкъедахьа дезарех, иштта молхашца дувзаденнарех, лазарашта дарба дара тӏехьа тахан керда хьадаьннарех. СКФО моттигашкара унахцӏенон оагӏонцара хьакимаш гулбелар цхьан истола гонахьа цу гӏулакхех дувца.
«Вай республикан тахан чӏоагӏа лоархӏаме да кхычахьа дикка пайда беш даьржадараш хьаэцар, мехка болх дӏахьош уж юкъекхувлар. Унахцӏенон хьал цхьан моттиге латтац, хӏара денна арадувл кердадараш, цунга хьежжа пайдане хургдараш теркалдеш хила деза вай, бахархошта гӏо дара тӏехьа», - белгалдир министр йолча ӏалбаканаькъан Зарас. Иштта цо теркалдир, цу кхетаченга гӏолла боккха пайда боаржабе йиш йолга, таханарча вахаре из геттара эшаш йолга.
