Наькъашкара хатараш лаьгӏдара тӏехьа, къахьегаш ба Шолжа-Шахьаре
Наькъашка нийслуш дола хатараш ма хулла лаьгӏде гӏерташ, къахьег тахан шахьарерча мэре. Дӏайихьача аргӏанарча кхетаче дийцар, цу балхаца дувзаденнарех. Из хоам «Сердалога» бир администраце зарбан болх лелабеча Батиганаькъан Хьавас.
«Шахьара да волча ӏумаранаькъан Аслана кулгал деш хиннача кхетаче, къоастадир цу мугӏаре кхоачашде дезараш. ӏаьдала болхлошца бувзаме болаш, тӏатеӏӏа дӏабахьа безаш лоархӏаме, боккха болх ба из. ГИБДД болхлоша белгалдечох, дӏадахача шера 12 хатар хиннад Шолжа-Шахьарерча наькъашка.
Керттера бахьан - машин лелае бокъо йоацаш бола 18 шерга кхачанза бараш наькъ тӏа бувлар. Укх тӏехьарча кхаь шера шахьаре хиннача хатарех дийцар ЦРБ лора. Хатарех лозабаь боккхийбараш 35%-га кхоачаш хул, цу юкъе бераш - 27%.
Эггара кастагӏа нийслуш дар да корта лозабар», - дийцар тхога кхетачен доакъашхоша. ӏумаранаькъан Аслана тӏадиллар; шахьарера цу оагӏонцара тӏахьожам ма хулла чӏоагӏбе, аьнна.
