ГӏалгӀайчен культуран министр хьежар, кагирхой театр цӏенхаштта тоадара балхага
ГӏалгӀайчен культуран, туризма Министр Лаьнанаькъан Залина хьежар, ГӏалгӀай паччахьалкхен кагирхой театр цӏенхаштта тоадеш бола болх мишта дӀахьу. Театра цӀа тоадеш да «Дезалера мах бараш, культуран хьал» яхача федеральни проектах, из чуйоагӀаш я «Дезал» яхача къаман проекта. Из лоархӀаме да мехка культуран хьал дегӀадоаладара, иштта кагирхой кхоллам тоабара дола хьалаш хьакхоллача.
«Театра кулгалхочо Куркъанаькъан Ӏадрахьмана хоам бир Министрага, баь баьннача балхах, цо белгалдир, керттера гӀишлон-монтажа болх баь хилар: пенаш хьалдеттад, чура юкъ дӀаеллай, кораш дӏаоттадаьд, уйна кӀийле кийчъяьй, иштта тока саьргаш чудаьхкад хила доагӀача моттигашка», - аьлар «Сердало» газетага моттигерча культуран урхаллене.
Моттиг шеръяро таро лургья театра репертуара оагӀонаш йоаржае, артистий кхоллама болх дӀабахьара дика хьалаш хьакхолла, иштта йоккхий культуран кхетаченаш дӀаяхьа.
ГӏалгӀайчен культуран, туризма Министерствос дӀахо а терко лоаттаергья, из болх мишта дӀахьу хьожаш; оттаяьча хана, дикал йолаш, из чакхбаккхара.
