Россе унахцӏенон Министр хилар Гӏалгӏайчен РКБ
Гӏалгӏай Республикан Кулгалхо Келаматанаькъан Махьмуд-Ӏаьла вахар; Российски Федераце унахцӏенон министраца Мурашко Михаилаца, Росздравнадзора кулгалхочунца Самойлова Аллайца; Гӏалгӏай Республикан клинически Ӏоахашканаькъан А.О. цӏерагӏча дарбанче.
Из кхетаче вӏашагӏйоллар бахьанаш дар, республикан йоккхагӏчарех цаӏ йолча лорий урхаллен болх бовзийтар, мехка унахцӏенон болх дегӏабоалабара таронаш ювцар, баьча балха мах оттабар. Цига, хоадам боллаш, гуш хилар дарбанчен карагӏдоалар, керттерча балха даькъ тӏара хоам бовзийтар, лорий новкъостал дара йола таронаш йийцар, Гӏалгӏайчен бахархошта дарба дара юкъедоахача лорий хьалех хьоахадир.
Керттера терко тӏаяхийтар, цу даькъ тӏа болхлой кхоачам болаш хила безара. Дарбанчен кулгалхоша, моттигерча унахцӏенон викалаша белгалдир, республикан унахцӏенон балха даькъ тӏа къона говзанчаш болх беш хургболаш, лаьрххӏа болх дӏахьош хилар.
Кастлуш, дарбанчен тоабанна юкъебаргба лорий лакхара дешар дийша къонабараш, царна дӏахо профессионально дегӏаахара, цар республике дӏахо болх бара дола хьалаш хьакхоллаш да. Из, Гӏалгӏайчен унахцӏено дегӏайоалаяра боаккхаш бола лоархӏаме гӏа ба.
Вайцига баьхка викалаш бахар бӏаргий лорий центре, вай заман гӏирсаш чулатта операционни оагӏув а царна гойтар. Унахцӏенон Министра Мурашко Михаила дийцар, лакха технологеш йолаш болх беш хиларах, тахан карагӏдувлача толамех, уж таронаш дӏахо дегӏайоалае лаьрхӏа хиларах. Иштта дийцар миай центра балхах, дӏадахача шера цига 80 операци яь хилар белгалдир. Иштта дале а, дӏахойодача хана уж лорий балха декхараш кхоачашдар кхы а дегӏадоаладе дезаш да, йолаш йола таронаш юкъе а йоахаш, из лоархӏаме дарба эшаш болча наха ма хулла дукхагӏа дӏакхоачийташ.
«Лоархӏаме къамаьл хилар урхаллен материальни кӏийле чӏоагӏъярах дувцаш. Тхона дагалаттар – лакха дикал йола лорий новкъостал Гӏалгӏайчен бахархошка дӏакхачийтар, арахьа дарба де аха ца безаш, сага унахцӏено тоаяра эшар ӏалашдар», - аьлар мехка кулгалхочо Келаматанаькъан Мухьмад-Ӏаьлас.
