Гӏалгӏайчен ӏалама министерствос тӏахьожам лоаттабу, Яндар яха хий цӏендара
Яндаре гӏолла ӏодоагӏа Яндар яхача хин бердаш цӏендара болх мишта дӏахьу хьежар Гӏалгӏайчен ӏалама министра гӏонча Ӏарчакханаькъан Ахьмад, хин тароний даькъа кулгалхо Хоаной Ӏаьла.
«Таханарча денга кхоачаш, 2026 шера бе лаьрхӏа хинна болх чакхбаьлар - 1,9 км йӏаьха хин йистош цӏенъяьй. Уж балхаш кхы а дӏахьош да. Дӏадахача шера цхьа километр хьоарсам цӏендаьдар. Еррига а цӏенъе еза хин йистош 4,766 км я. Уж моттигаш цӏенъяро 155 вахархочоа, 28 цӏенна, иштта вахарца ювзаеннача моттигашта таро лургья доккхий догӏаш дийлха, ӏаьржа хиш доагӏаш хуле, зе ца хулийташ гӏулакх дӏадеразаде. Балхаш дӏадоладир дӏадахача шера, уж йистедаргда 2027 шера», - аьлар «Сердало» газетага мехкарча ӏалама Министерстве.
Хин йистош цӏенъеш дӏахьоча балхаша новкъостал ду экологически хьал тоаде, хий ший боарамах дӏадахийта.
