Россе ӏалама Министерствос хьаллаьцар, Гӏалгӏайчен Шолжа хин йистош чӏоагӏъяр
Гӏалгӏайчен ӏалама Министерствон кулгалхочун Мизенаькъан Микаила федеральни министра гӏончаца Корольков Максимаца балха тӏехьа кхетаче йолаш, теркама юкъе хилар Шолжа хин бердаш чӏоагӏдара дош. Из деш да мехка юрташ хих кӏалхаръ- яха.
«Цига йийцар ши моттиг. Хьалхаръяр - Эбарга-Юртарча Чкалова урам тӏара бердий йистош чӏоагӏъяр духьа гӏирсаш хьалдар. Цига шин оагӏорахьара доагӏа хиш вӏашагӏкхеташ хиларах, уж сихлуш моттиг я, из бахьан долаш наьха фусамашка, коашка чудувл. Из моттиг 1,9 км йӏаьха я, берда шин оагӏорахьара цо лорадергда 141 цӏа. Цига вах 770 саг. Шоллагӏа моттиг - Шолжерча Крупская урамах я, цига кхерамеча хьале нийслу 84 цӏагӏа ваха саг (504), ишттачарех я ишкол-интернат, ден-бус цига ӏеш дола 230 бер, берий беш. Ювцача моттиге хьалбеш бола гӏирс хургба 1,85 км. Из эшаш хилар чӏоагӏду кхело баьча тохкамо, из беча хана цу юкъе яр «Центррегионводхоз» ФГБУ, Малхбузен-Каспийски БВУ, МЧС, иштта моттигера доал ду ӏаьдал, цар дӏалаьрхӏар бахархой дехараш», - аьлар «Сердало» газетага моттигерча ӏалама Министерствос.
Кхетачен чаккхе еш, Корольков Максима уж шаккхе а проект кхоачашъяр хьаллаьцар. Из болх дӏаболабара каьхаташ кийча да. Хӏанз де дезар да маьхашка хьажар, дӏадодача ахчан хоадам бар. Из кхоачашдар тӏадиллад, цу оагӏон болхлошта.
