Боксах республикан Хьалхале яьккхараш хьакхайкабир
Физически культуран, спорта Министерствос хьакхайкабир боксах ГӏалгӀай Республикан 17-18 шу даьннарашта юкъе хьалхале дӏахьош котбаьннараш, из хетаяь яр халкъашта юкъерча класса спорта мастера Дзовранаькъан БейӀаьла, яхаш, дийцар тха газетага.
«Йоккхача спортивни яхьашка, тӀоарска кулгахйоаллорга говзанчаш гулбир цхьан майдан тӀа, Къилбаседа Кавказа федеральни куран Хьалхален яхьашка кхача ловраш бар уж. ГӏалгӀайчен бокса ишкола викалаша дика кийчо гойтар цига. Доакъашхой яхьебаьлар 13 дозалах - 51 - 92 кг », - аьлар хоамо.
Юххера яхьаш чакхйоалаш, лакхара моттигаш яьхарех хилар Хамхой ИбрахӀим (51 кг), Беканаькъан ӏаддал (54 кг), Налганаькъан Мухьмад (57 кг). Овшанаькъан ӏаддал (60 кг), Джанхотанаькъан Элберд (63,5 кг) Баьзенаькъан ӏаддал-Малик (67 кг), ӏаьленаькъан Мовсар (71 кг), Бузуртанаькъан Мухьмад (75 кг), Тӏумхой Ювназ (80 кг), Хамхой Адам (86 кг), Галай Адам (92 кг), Дзовранаькъан Мухьмад-Амин (+ 92 кг).
Дото совгӀаташ даьхар Янданаькъан Рамзана (51 кг). Тӏумхой Османа (54 кг), Янданаькъан Муслима (57 кг), Къоастой Мухьмад-Амина (60 кг), Малсаганаькъан Хьамзата (63,5 кг), Тагиров Хыйсас (67 кг), Итазанаькъан Дене (71 кг), Цхьорой Адама (75 кг), Дзейтанаькъан Расула (80 кг), Колой Мовлат-Гире (86 кг), Арсанаькъан ИсмаӀала (92 кг), Джандиганаькъан Сайт-Мухьмада (+92 кг).
Дозал 63,5 кг лакхагӀа долчарна, совгӀаташ делар ГӏалгӀай Республикан спорта Министерствос, уж яр бокса кулгахйоахкоргаш, тӀабувха спортивни гӀирс, лоравалара техкаш йола кийнаш. Цу даькъ тӀа котваьнна Джанхотанаькъан Элберд лаьрххӀача совгӀатаца белгалвир.
