ГӀишлон министерствос республике хьалъергья шиъ лоархӀаме вахара моттиг
ГӏалгӀайчен гӀишлон, вахара- коммунальни боахама министерствос, карарча шера даьча балхий чаккхе йир, уж дӀахьош да Россе къахьегама, вахара защита бокъонаш лораяра чудоагӀаш. Уж да вахаре лоархӀаме ши цӀа - МагӀалбика психоневрологически 200 моттига лаьрхӀа йола интернат, Сурхотӏара ветераний цӀа. Уж проекташ кхоачашъяра 2025 шера хьахьожадир 734 млн совгӀа ахча. Таханарча денга кхоачаш, уж бӀарчча кассага гӀолла чакхдаьннад ала йиш йолаш да.
«Карарча шера, тушола бетта дӀадоладир ветераний Цӏа тоаде, из хьалдаьд 1992 шера. Къаьнара гӀишло лардашка кхаччалца ӏойоаха а яь; из хиннача моттиге, кердача каркасах кхозза вӀаштара яь гӀишло хьалйир. Арахьара газоблоках дола пенаш хьалдеттар, дӀахьош да уж тӀера кирпишках хьалдоттара дола балхаш. Чакхбоалаш ба инженерни, чура пенашта юкъера йовкъамаш йохкара, кораш дӀаоттадара болх. Фо чукхетийтара, тока Ӏалашо яра балхаш дӀахьош да. МагӀалбике, гӏишлон-монтажни балхаш дӀахьош да бӏаьсти денз. Укхаза кӀоаг баьккхаб, лардаш дӏа йохкаш, Ӏоакъа оттаяьй; аьшкабетона гом оттабаьб наб еча цӏенна. Цул совгӀа котельни, бӀеха хиш дӏаахарах йолча моттигашта лардаш ехкай. Таханарча заман гӀишло хьалъяь яргья 3,2 гектара тӀа», - аьлар «Сердало» газетага ГӏалгӀайчен гӀишлон Министерстве.
Шаккхе а моттиг хьатӀадоагӀача шерга йоалаш я. Сурхо тӀарча ветераний Цӏа кердадаккхара деш дола балхаш чакхдаргда бӀаьсти, хӀаьта Магӏалбика психоневрологически интернат яь яргья 2027 шера.
Уж балхаш дика чакхдахаро ГӏалгӀайчен социальни хьал дегӀадоаладара дика новкъостал дергда, из лоархӀаме да республикан бахархой вахара таронаш тоаеча.
